Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 94 Hüküm no: 42 Orijinal metin no: [8b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. Şeyh Mehmed Efendi’nin evini istiğlâl yoluylasatması Husûs-ı âti’l-beyânın mahallinde ketb ve tahrîri iltimâs olunmağın savb-ı şer‘-i hatîrden mevlânâ Abdüsselâm Efendi b. Nasuh irsâl olunup ol dahi medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Baba Haydar mahallesi sâkinlerinden olup sâbıkan Galata kadısı olan umdetü’l-mevâlyyi’l-izâm, zübdetü’l-e‘âli’l-fihâm, yenbû‘ü’l-fezâ’il, metbû‘ü’l-efâzıl Mehmed Efendi b. el-merhûm eş-Şeyh Mehmed Efendi hazretlerinin sa‘âdet-hânelerine varıp zeyl-i kitâbda muharrerü’l-esâmî müslimîn huzûrunda akd-i meclis-i şer‘-i mübîn eyledikde mûmâ-ileyh Mehmed Efendi meclis-i ma‘kūd-ı mezbûrda hâlâ kasaba-i Beşiktaş’da Sinan Paşa mahallesinde sâkine olup kendi malından vücûh-ı hayrât için vakf ve haps eylediği nukūdun bi’l-fi‘l mütevellîsi olan umdetü’l-muhadderât bâ‘isetü hâze’l-kitâb Fâtıma Hâtun bt. el-merhûm Abdurrahim taraflarından tasdîk-i âti’l-beyâna vekîl-i sâbitü’l-vekâlesi olan Ali Ağa b. Oruc nâm kimesne mahzarında asâleten ikrâr ve takrîr-i kelâm edip silk-i mülk-i sahîhimde münselik olup zikr olunan Baba Haydar mahallesinde vâki‘ bir tarafdan Kerime Hâtun mülkü ve bir tarafdan merhûm Kapıcızâde Ahmed Efendi’nin veresesi mülkleri ve iki tarafı tarîk-i âm ile mahdûd hâriciyye ve dâhiliyyesi büyût-ı adîde ve hamam ve kanavât-ı müsennât ile muharrer dört masura mâ’-i cârî ve köşkü ve fıskiye ve hadîkayı müştemil menzilimi bi cümleti’t-tevâbi‘ ve’l-levâhık müvekkil-i [mütevelliye-i] mezbûre [Fâtıma] Hâtun’a iki bin kıt‘a esedî guruşa bi tarîki’l-istiğlâl bey‘ ve teslîm ol dahi mâl-ı vakf-ı mezbûr ile tarîk-i merkūm üzre iştirâ ve tesellüm ve kabûl eyleyip semeni olan meblağ-ı mastûr iki bin guruşu mütevelliye-i mezbûre [Fâtıma] Hâtun yedinden tamâmen ahz ve kabz eylediğimden sonra mütevelliye-i mezbûre [Fâtıma] Hâtun menzil-i mahdûd-ı mezbûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâb senesi Recebi’l-ferdi gurresinden bir sene tamâmına değin üç yüz kıt‘a esedî guruş ücret ile bana îcâr ve teslîm ben dahi ber vech-i muharrer istîcâr ve tesellüm ve kabûl eyledim dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Mehmed b. Eyüb ile meclis-i şer‘a gelip her biri alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî aşer min Recebi’l-ferd li sene tis‘în ve elf. Şuhûdü’l-hâl: Fahrü’l-müderrisîni’l-kirâm Mehmed Efendi b. Abdülbâkī Efendi, Zahrü’l-müsta‘iddîn Hüseyin Efendi b. Bayram en-Niğdevî, Abdullah Efendi b. Mehmed, Mustafa Çelebi b. Ramazan, Mehmed Efendi b. Veli, Derviş Efendi b. Mehmed, Davud Ağa b. Mehmed, İsmail Bey b. Mustafa, Mehmed b. Eyüb.