Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 95 Hüküm no: 43 Orijinal metin no: [8b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yahya Çelebi b. Ahmed’in alacak iddiasının reddi Fi’l-asl vilâyet-i Anadolu’da Fenaris kazâsına tâbi‘ Aydınlı nâm karye ahâlîsinden olup Havâss-ı Aliyye kazâsı a‘mâlinden Terkos nâhiyesine tâbi‘ Balaban Burnu demekle ma‘rûf mahalde vâki‘ beylik mandırada imâm iken târih-i kitâbdan on yedi ay mukaddem vefât eden Şaban Halîfe b. Hızır nâm müteveffânın yedinde olan hüccet-i şer‘iyye mûcebince usûbet-i nesebiyye cihetinden hasren vârisi olduğu sâbit ve zâhir olan Mustafa b. Mehmed nâm kimesne tarafından Hasan Bey b. Mehmed ve Mustafa b. Ahmed nâm kimesneler şehâdetleriyle hasm-ı câhid mahzarında meblağ-ı âti’l-beyânı da‘vâ ve taleb ve ahz ve kabza vekâleti sâbite olan Yahya Çelebi b. Ahmed nâm kimesne meclis-i şer‘-i şerîfde nâhiye-i mezbûreye tâbi‘ Ayazma nâm karye ahâlîsinden sâhib-i hâze’s-sifr Kerniya v. Dimitri nâm zimmî muvâcehesinde bi’l-vekâle üzerine da‘vâ ve takrîr-i kelâm edip müteveffâ-yı mezbûr Şaban Halîfe’nin merkūm Kerniya zimmetinde hüccet-i karz-ı şer‘îden yüz esedî guruş hakkı olup kable’l-ahz fevt olmağla meblağ-ı mersûm bi’l-irsi’ş-şer‘î müvekkilim mezbûr Mustafa’ya intikāl etmekle meblağ-ı merkūmu hâlâ vekâletim hasebiyle taleb ederim suâl olunup alıverilmesi murâdımdır dedikde gıbbe’s-suâl mezbûr Kerniya cevâbında fi’l-vâki‘ müteveffâ-yı mezbûr Şaban Halîfe’ye cihet-i merkūmeden zimmetimde yüz esedî guruş deynim var idi lâkin vefâtından on ay mukaddem müteveffâ-yı mezbûrun hâl-i hayâtında ve kemâl-i akl-i sıhhatinde zikr olunan mandırada şuhûd-ı udûl muvâcehelerinde meblağ-ı merkūmu merkūm Şaban Halîfe’ye bi’t-tamâm edâ ve teslîm edip ol dahi yedimden tamâmen ahz ve kabz etmişidi deyû def‘le mukābele edicek isre’l-istintâk ve akībe’l-inkâr ve isre talebi’l-beyyine udûl ve ahrâr-ı ricâlden mahmiye-i İstanbul’da Karagümrük kurbunda vâki‘ gölden beher sene mahmiye-i İstanbul’a bey‘ için balık getirmek takrîbiyle meblağ-ı merkūmu mesfûr Kerniya müteveffâ-yı mezbûre hayâtında teslîm ettiği vakitde mezkûr mandırada hâzır bulunan Kaba Hasan Beşe b. Mehmed nâm kimesne ile sâlifü’z-zikr mandırada sâkin Ahmed b. Mahmud nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ mersûm Kerniya zimmetinde lâzımü’l-edâ deyni olan yüz esedî guruşu târih-i mezbûrda ve mahall-i merkūmda müteveffâ-yı mezbûr Şaban Halîfe’ye hayâtında bizim huzûrumuzda def‘ ve teslîm edip mezbûr Şaban Halîfe dahi meblağ-ı merkūmu tamâmen ahz ve kabz eylediğinden sonra müteveffâ-yı mezbûr mersûm Kerniya’nın zimmetinde bir akçe ve bir habbe hakkım bâkī [9a] kalmadı deyû yine bizim huzûrumuzda kirâren ve mirâren ikrâr dahi edip bizi işhâd eyledi. Bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylelediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebiyle vekîl-i mezbûr Yahya Çelebi’yi meblağ-ı merkūm talebiyle mesfûr Kerniya’ya bî-vech ta‘arruzdan men‘ birle mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min şehri Recebi’l-ferd sene [10]90. Şuhûdü’l-hâl: Hasan Çelebi b. Ali, Mehmed b. Eyüb, Mehmed b. Mahmud, Ali b. Abdullah, Ali b. Ahmed ve gayruhüm.