Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 96 Hüküm no: 44 Orijinal metin no: [9a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Osman ile Mehmed Beşe b. Mustafa’nın boşanması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Zeyneb Hâtun mahallesi sâkinelerinden Âişe bt. Osman nâm hâtun meclis-i şer‘-i şerîf-i hatîr-i lâzımü’t-tevkīrde zevci işbu râfi‘ü’l-kitâb Mehmed Beşe b. Mustafa nâm kimesne mahzarında bi tav‘ihâ ikrâr-ı tâm ve takrîr-i kelâm [edip] mezbûr Mehmed Beşe zevcim olup lâkin beynimizde hüsn-i mu‘âşeretimiz olmamağla zimmetinde mütekarrir ve ma‘kūdun aleyh olan yedi bin akçe mehr-i müeccel hakkım ve nafaka-i iddet-i mu‘ayyenem ile mezbûr Mehmed Beşe zimmetinde cihet-i deyn-i şer‘îden olan otuz beş esedî guruş hakkımdan fâriğa olup ve me’ûnet-i süknâm dahi kendi üzerime olmak üzre sâir hukūk-ı zevciyyete müte‘allika âmme-i de‘âvîden zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde ol dahi ber vech-i muharrer hul‘u kabûl ve hukūk-ı zevciyyete müte‘allika da‘vâdan ben dahi merkūme Âişe’nin zimmetini ibrâ ve iskāt eyledim dedikde ehadühümâ âharın kelimât-ı mahkiyesini vicâhen ve şifâhen tasdîk ve tahkīk etmeğin mâ vaka‘a gıbbe’l-ibtigā ketb olundu. Fi’l-yevmi’r-râbi‘ aşer min Recebi’l-mürecceb li sene tis‘în ve elf. Şuhûdü’l-hâl: Osman Çelebi b. Mehmed Usta, Hüseyin Çelebi b. Mustafa, Mehmed Beşe b. Mustafa, Musa b. Receb, Hüseyin Çelebi b. Ali, Mehmed Beşe b. Mustafa, Mehmed b. Eyüb, Hasan b. Abdullah.