Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 97 Hüküm no: 45 Orijinal metin no: [9a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Maksud’un dükkân eşyalarını Hacı Ali b. Sefer’e satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Câmi‘ü’l-Kebîr mahallesinde sâkin iken bundan akdem vefât eden Veyis b. Mehmed’in sulbî sagīr oğlu Mehmed’in tesviye-i umûru için kıbel-i şer‘den vasiyy-i şer‘îsi ve vâlidesi olan Sâliha Hâtun bt. Maksud meclis-i şer‘-i hatîr-i lâzımü’t-tevkīrde el-Hâc Ali b. Sefer mahzarında ikrâr ve takrîr-i kelâm edip müteveffâ-yı mezbûrun terekesinden olup Hazret-i Ebâ Eyyûb-i Ensârî câmi‘-i şerîfi kurbunda vâki‘ mezbûr el-Hâc Ali’nin mülk dükkânının müteveffâ-yı mezbûr müste’ciri olmağla müteveffâ-yı mezbûrun kendi emlâkinden olup dükkân-ı mezbûr içinde mevcûd olan bir tabla ve bir şinik ve bir çuval ve on bir fıçı ve iki çarşaf sâir beynimizde ilm-i şer‘î ile adedi ve cinsi ve kaddi ma‘lûm âlât-ı dükkânı bâ vesâye mezbûr el-Hâc Ali’ye iki bin fıddî râyic fi’l-vakt akçeye bey‘-i kat‘î ile bey‘ ve teslîm ol dahi ber vech-i muharrer iştirâ ve temellük ve kabûl edip semeni olan meblağ-ı merkūm iki bin akçeyi mezbûr el-Hâc Ali yedinden tamâmen ahz ve kabz eyledim min ba‘d dükkân-ı mezbûr içinde mevcûd olan eşyâda kat‘â alâka ve medhalim yokdur mezbûr el-Hâc Ali’nin mülküdür dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî aşer min Recebi’l-mürecceb li sene tis‘în ve elf. Şuhûdü’l-hâl: Es-Seyyid el-Hâc İbrahim b. es-Seyyid Zeyneddin, Mustafa Çelebi b. İbrahim, Mehmed Çavuş b. Mustafa, Ali Çavuş b. Cafer, Mehmed Beşe b. Abdullah, Mehmed Çelebi b. Eyüb.