Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 98 Hüküm no: 46 Orijinal metin no: [9a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Avraham v. Yasef’in hayattayken Murdehay v. Salamon’u vasî tayin ettiği Havâss-ı Filibe kazâsı a‘mâlinden kasaba-i Hasköy’de Kiremitçi Ahmed Çelebi mahallesinde sâkin râfi‘-i hâze’r-rakīm isfenahçı Murdehay v. Salamon nâm Yahudi meclis-i şer‘-i şerîfde yine mahalle-i mezbûrede sâkin iken bundan akdem hâlik olan Avraham v. Yasef nâm Yahudinin terekesine vâzı‘atü’l-yed olan zevce-i metrûkesi Lisaro bt. İlya nâm Yahudiye muvâcehesinde üzerine da‘vâ ve takrîr-i kelâm edip hâlik-i mezbûr helâkinden on gün mukaddem evlâd-ı sıgārına ba‘de helâkihî intikāl-i âdî ile intikāl eden menzillerini kabza ve iktizâ eden zarûret-i nafakaları için bedel-i ma‘lûmu mukābelesinde âhara ferâğa ve sâir levâzım-ı mühimmelerine beni vasiyy-i muhtâr nasb ve ihtiyâr edip ben dahi vesâyet-i merkūmeyi kabûl ve hıdemât-ı lâzımesini edâya müteveccih olmuşiken hâlâ mesfûre Lisaro hâlik-i mesfûrdan olan sıgārına intikāl eden menzillerini ve sâir cüz’î ve küllî eşyâlarını kabza mâni‘a olur. Suâl olunup men‘ ve def‘ olunmak murâdımdır dedikde gıbbe’s-suâl mezbûre Lisaro tereke-i muhallefât-ı mezbûreye [va]z‘-ı yedini ikrâr lâkin zevci hâlik-i mezbûr hayâtında mezbûr Murdehay’ı minvâl-i muharrer üzre vasiyy-i muhtâr nasb ve ihtiyâr eylediğini inkâr edicek mezbûr Murdehay’dan müdde‘âsını mübeyyine beyyine taleb olundukda tâife-i mezbûreden olup mahalle-i mezbûre sâkinlerinden Avraham v. Hayim ve Salamon v. Yako ve Murdehay v. Yasef nâm Yahudiler li ecli’ş-şehâde makām-ı kazâda hâzırûn olup isre’l istişhâd fi’l-hakīka hâlik-i mezbûr hayâtında mezbûr Murdehay minvâl-i muharrer-i meşrûh üzre bizim huzûrumuzda vasiyy-i muhtâr nasb ve ihtiyâr edip ol dahi vesâyet-i mezbûreyi kabûl ve hıdemât-ı lâzımesini edâya müte‘ahhid oldu biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde gıbbe ri‘âyeti merâsimi’l-kabûl şehâdetleri makbûle olmağın mesfûr Murdehay’ın vesâyetine ba‘de’l-hükm hâlik-i mesfûrdan evlâd-ı sıgārına intikāl eden menzil ve sâir eşyâlarını merkūm Murdehay’ın ahz ve kabzına mâni‘a olmamak üzre mesfûre Lisaro’ya tenbîh birle mâ vaka‘a bi’t-taleb ketb olundu. Fi’l-yevmi’s-sâlis aşer min şehri Recebi’l-mürecceb li sene tis‘în ve elf. Şuhûdü’l-hâl: Hüseyin b. Ali, Mehmed b. Eyüb, Mehmed b. Mahmud, Ali b. Abdullah, ve gayruhüm mine’l-hâzırîn.