Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 98 Hüküm no: 47 Orijinal metin no: [9a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eski Anadolu Kazaskeri Mustafa Efendi’nin fırınını kiralayan Avraham ve Donvak’ın borçlarını kabul etmeleri Husûs-ı âti’l-beyânı mahallinde ketb ve tahrîr için bi’l-iltimâs savb-ı şer‘den mevlânâ Mustafa Efendi b. İsmail irsâl olunup medîne-i Hazret-i Ebâ Eyyûb-i Ensârî müzâfâtından kasaba-i Hasköy’de Sütlüce nâm mahalde vâki‘ sâbıkan sadr-ı Anadolu olan a‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în keşşâfü’l-müşkilâti’d-dîniyye hallâlü’l-mu‘dilâti’l-yakīniyye câmi‘ü’l-fürû‘ ve’l-usûl hâvi’l-ma‘kūl ve’l-menkūl sa‘âdetlü Mustafa Efendi’nin yalı ta‘bîr olunur menzillerine varıp zeyl-i kitâbda muharrerü’l-esâmî olan müslimîn huzûrunda akd-i meclis-i şer‘-i şerîf eyledikde ekmekçi tâifesinden Avraham v. Kaynar ve Donvak v. Magridi nâm Ermeniler meclis-i ma‘kūd-ı mezkûrda işbu kitâb-ı sıhhat-nisâbın sâhibi müşârün-ileyh Mustafa Efendi hazretleri taraf-ı bâhirü’ş-şereflerinden ikrâr-ı âti’l-beyânı tasdîke vekîl-i sâbitü’l-vekâlesi olan el-Hâc Veli Ağa b. Eyüb mahzarında her biri tav‘an ikrâr ve i‘tirâf edip mûmâ-ileyh Mustafa Efendi hazretleri medîne-i mezbûre mahallâtından Nişancı Paşa mahallesinde vâki‘ lede’l-ahâlî ve’l-cîrân ma‘lûmü’l-hudûd mülk ekmekçi fırınını ale’l-iştirâki’s-seviy ekmek tabh etmek için beher yevm yüz otuz beş [9b] akçeden her otuz gün tamâmında dört bin elli akçe ücret vermek üzre bize îcâr ve teslîm biz dahi minvâl-i muharrer üzre ale’l-iştirâki’s-seviy istîcâr ve tesellüm ve kabz ve kabûl eyledik dediklerinde gıbbe’t-tasdîki’ş-şer‘î mezbûrân Avraham ve Donvak meclis-i ma‘kūd-ı mezkûrda i‘âde-i kelâm edip müvekkil-i mûmâ-ileyh efendi hazretleri kendi mallarından olmak üzre yed-i şerîfelerinden ale’l-iştirâki’s-seviy deynimiz olmak üzre bin esedî guruş istikrâz ve ahz ve kabz eyledik hâlâ müvekkil-i müşârun ileyh efendi hazretlerine zimmetimizde lâzımü’l-edâ ve vâcibü’l-kazâ bin esedî guruş deynimizdir dediklerinden sonra meblağ-ı mezbûrda dahi her birimizin zimmetine edâsı lâzım gelen mala her birimiz emr ve kabûlü hâvî bey‘-i bâtt-ı sahîh-i şer‘iyye ile kefîl olduk dediklerinde gıbbe’t-tasdîki’l-mu‘teber vâki‘ hâli mevlânâ-yı mezbûr mahallinde ma‘an irsâl olunan Muhzır Ali b. Ahmed ile meclis-i şer‘a gelip vukū‘u üzre inhâ etmeğin mâ vaka‘a gıbbe’t-taleb kayd şüd. Fi’l-yevmi’t-tâsi‘ min şehri Recebi’l-ferd li sene tis‘în ve elf. Şuhûdü’l-hâl: Mehmed Efendi b. Mehmed, Mustafa Efendi b. Osman, Mustafa b. Sinan, Receb b. Mehmed, Mehmed b. Hasan, Mahmud b. Abdullah.