Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 99 Hüküm no: 48 Orijinal metin no: [9b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bayram b. Ramazan’a Mehmed b. İsmail’e olan borcunu ödemesi için mühlet verilmesi Mahmiye-i İstanbul’da Saraçhâne kurbunda sâkin bâ‘is-i hâze’l-kitâb Mehmed b. İsmail nâm kimesne mahfil-i kazâda Havâss-ı Aliyye kazâsına tâbi‘ Kağıdhâne nâm karye ahâlîsinden Bayram b. Ramazan nâm kimesne mahzarında üzerine da‘vâ ve takrîr-i kelâm edip mezbûr Bayram’a târih-i kitâbdan üç ay mukaddem yirmi dokuz esedî guruşa, bey‘ ve teslîm ol dahi ber vech-i muharrer iştirâ ve tesellümden sonra meblağ-ı merkūmdan on beş guruşunu üç ay tamâmında vakt-i hasâdda vermek üzre te’cîl olunmuş idi hâlâ ecel-i mezbûr tamâm olmağla meblağ-ı müeccel on beş guruşu taleb ederim suâl olunup alıverilmesi matlûbumdur dedikde gıbbe’s-suâl mezbûr Bayram cevâbında ber vech-i muharrer öküz bahâsından meblağ-ı mezkûr yirmi dokuz esedî guruş müdde‘î-i merkūm Mehmed zimmetinde lâzımü’l-kazâ ve lâzımü’l-edâ deyni olduğunu ve meblağ-ı merkūmdan on beş guruşun eceli tamâm olduğun ikrâr ve i‘tirâf etmeğin mûcebiyle meblağ-ı merkūmdan eceli hulûl eden meblağ-ı merkūm on beş guruşun müdde‘î-i mezbûr Bayram Beşe’ye tenbîh olundukdan sonra meblağ-ı bâkī on dört esedî guruşun ecel-i hulûlüne değin imhâl olunmağın mâ vaka‘a bi’t-taleb kayd olundu. Fi’l-yevmi’l-hâdî aşer min şehri Recebi’l-mürecceb li sene tis‘în ve elf. Şuhûdü’l-hâl: Hasan b. Abdullah, Mehmed b. Eyüb, Ali b. Abdullah, Mehmed b. Mahmud.