Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 100 Hüküm no: 49 Orijinal metin no: [9b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Ağa b. Abdüddâim’in para ve tüfek hususunda zimmetinin ibra edilmesi Fi’l-asl vilâyet-i Anadolu’da livâ-i Afyon Karahisar’ında Şuhud kasabası mahallâtından Kerâmeddin mahallesi ahâlîsinden olup hâlâ mahmiye-i İstanbul’da Karagümrük kurbunda asesbaşı odalarında müsâfiren sâkin olan Ramazan b. Hanefi nâm kimesne meclis-i şer‘-i şerîfde bi’l-fi‘l livâ-i mezkûre mütesellimi olan işbu râfi‘ü’l-kitâb iftihârü’l-ümerâ ve’l-ekârim câmi‘ü’l-mehâmid ve’l-mekârim Yusuf Ağa b. Abdüddâim tarafından husûs-ı âti’l-beyâna vekîl-i sâbitü’l-vekâlesi olan Mehmed Ağa b. Ali mahzarında tâyi‘an ikrâr-ı tâm ve takrîr-i kelâm edip müvekkil-i mûmâ-ileyh Yusuf Ağa bundan bi gayri hakkın yirmi esedî guruşumu ile iki tüfengimi ahz ve kabz etmekle ben dahi meblağ-ı mezkûr ile mârrü’z-zikr tüfengi müvekkil-i mezbûr Yusuf Ağa’dan da‘vâ, ol dahi inkâr ile cevâb vermekle, beynimizde nizâ‘-ı küllî vâki‘ oldukdan sonra beynimize muslihûn-ı müslimûn tavassut edip meblağ-ı mezkûr yirmi guruş ile sâlifü’z-zikr tüfenk da‘vâsından an inkâr beni yirmi beş esedî guruş üzerine inşâ-i akd-i sulh eylelediklerinde ben dahi sulh-ı mezbûru kabûl ve bedel-i sulh olan meblağ-ı merkūm yirmi beş guruşu vekîl-i mezbûr Mehmed Ağa yedinden bi’t-tamâm ahz ve kabz edip min ba‘d meblağ-ı mezkûr yirmi esedî guruş ile mezkûr tüfenklere müte‘allika da‘vâdan müvekkil-i mûmâ-ileyh Yusuf Ağa’nın zimmetini ibrâ-i âm ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’l-ibtigā ketb olundu. Fi’l-yevmi’l-hâmis aşer min şehri Recebi’l-ferd li sene tis‘în ve elf. Şuhûdü’l-hâl: Mustafa Ağa b. ( ) Kethüdâ-yı Hatice Sultan, Ali Ağa b. ( ) karındaşı Mustafa Ağa, Dilâver Çavuş b. Abdullah, Mehmed b. Eyüb, Ali b. (…).