Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 101 Hüküm no: 50 Orijinal metin no: [9b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dava konusu olan beygirin devlete ait olduğunun ortaya çıkması Medîne-i Hazret-i Ebâ Eyyûb-i Ensârî’de Câmi‘-i Kebîr mahallesinde vâki‘ bostancı tâifesinden Kirkor v. Fati nâm Ermeni meclis-i şer‘-i şerîfde el-Hâc Mehmed b. Mustafa nâm kimesne mahzarında üzerine da‘vâ ve takrîr-i kelâm edip mezbûr el-Hâc Mehmed târih-i kitâbdan beş gün mukaddem sol tarafında elmacık altında mîrî damgalı iğdiç kır bârgiri kendinin mülkü olmak üzre sekiz esedî guruş ve bir rub‘a bana bey‘ ve teslîm ben dahi minvâl-i muharrer üzre iştirâ ve kabz ve semenini kendiye bi’t-tamâm edâ ve teslîm ettiğimden sonra sâlifü’z-zikr bârgir hâlâ vekîlü’s-saltanatı- (…) [’s-seniyye] emînü’d-devleti’l-aliyye sadr-ı a‘zam hazretlerinin mîrî bârgirlerinden olmağla sadr-ı a‘zam hazretlerinin bi’l-fi‘l mirahor olup gāib ani’l-meclis Ali Ağa mezkûr bârgirin taraf-ı mezbûrunda mîrî damga bulunmağla cânib-i mîrî için merkūm bârgiri târih-i kitâbdan beş gün mukaddem ahz ve kabz eyledi suâl olunup bârgir-i mezkûr mezbûr el-Hâc Mehmed’in mülkü olmak zu‘muyla kendiye teslîm eylediğim sekiz guruş bir rub‘u bana teslîme tenbîh olunmak matlûbumdur dedikde gıbbe’s-suâl mezbûr el-Hâc Mehmed cevâbında zikr olunan bârgiri benden dahi târih-i kitâbdan bir buçuk ay mukaddem mahmiye-i İstanbul’da Atpazarı canbazlarından gāib ani’l-meclis Kara Mustafa nâm kimesneden sekiz esedî guruşa iştirâ eyleyip mülk-i müşterâm olmak üzre târih-i kitâbdan beş gün mukaddem semen-i mezkûr sekiz guruş bir rub‘a müdde‘î-i mezkûra bey‘ ve teslîm ve kabz-ı semen eyledim lâkin sâlifü’z-zikr bârgir mîrî bârgirlerden olup ve mîrî için müdde‘î-i mezkûr yedinden ahz ve kabz olunduğu ma‘lûmum değildir deyû redd-i cevâb edicek müdde‘î-i mezbûr Kirkor’dan sıdk-ı makālini mübeyyine beyyine taleb olundukda udûl-i ahrâr-ı ricâl-i müslimînden olup yine mahalle-i mezbûre sâkinlerinden Ali Beşe b. Hasan ve Mehmed Çelebi b. Bâli nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ zikr olunan bârgir mîrî bârgirlerden olup mirahor-ı mezbûr Ali Ağa zikr olunan bârgir mîrî bârgirlerinden olmağla mezbûr Kirkor yedinden mîrî damgasıyla bulup mîrî için ahz ve kabz [etmişdir] biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye [eylediklerinde] gıbbe’t-ta‘dîl ve’t-tezkiyye şehâdetleri makbûle olmağın mûcebiyle semen-i mezbûr sekiz esedî guruş ile bir rub‘u müdde‘î-i mezbûra edâ ve teslîme mezbûr el-Hâc Mehmed’e tenbîh birle kayd şüd. Fi’l-yevmi’s-sâbi‘ aşer min şehri Recebi’l-ferd li sene tis‘în ve elf. Şuhûdü’l-hâl: Mehmed b. Eyüb, Mehmed b. Mahmud, Ali b. Abdullah, Hasan b. Abdullah ve gayruhüm.