Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 102 Hüküm no: 51 Orijinal metin no: [10a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Abdullah’a Hasan b. İbrahim’e olan borcunu ödemesi Mahmiye-i İstanbul’da Kebeciler hanında sâkin bâ‘is-i hâze’l-kitâb Hasan b. İbrahim nâm kimesne mahfil-i kazâda medîne-i Hazret-i Ebâ Eyyûb-i Ensârî ahâlîsinden Mustafa b. Abdullah nâm kimesne mahzarında üzerine da‘vâ ve takrîr-i kelâm edip mezbûr Mustafa zimmetinde beynimizde adedi ve cinsi ve kadri ma‘lûm bogasi ve astar semenlerinden yedi bin elli akçe hakkım olup hâlâ taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Mustafa cevâbında ber vech-i muharrer bogasi ve astar semenlerinden meblağ-ı mezkûr yedi bin elli akçe müdde‘î-i merkūm Hasan zimmetinde lâzımü’l-kazâ ve lâzımü’l-edâ deyni olduğunu ikrâr ve i‘tirâf etmeğin mûcebiyle meblağ-ı merkūm yedi bin elli akçeyi müdde‘î-i mezbûr Hasan’a edâ ve teslîme mezbûr Mustafa’ya tenbîh birle mâ vaka‘a bi’t-taleb ketb olundu. Fi’l-yevmi’s-sânî aşer min şehri Recebi’l-ferd li sene [10]90. Şuhûdü’l-hâl: Es-Seyyid Ârif Çelebi b. Mustafa, Mehmed b. Mahmud, Hasan b. Abdullah, Mehmed b. Eyüb ve gayruhüm mine’l-hâzırîn