Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 102 Hüküm no: 52 Orijinal metin no: [10a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Ağa b. Kasım’ın kürkünün Fâtıma bt. Mustafa’da olduğu Mahmiye-i İstanbul’da Atmeydanı kurbunda İskender Ağa mahallesi sükkânından olup sâbıkan Sivas mütesellimi olan Hasan Ağa b. Kasım tarafından husûs-ı âti’l-beyâna vekîl olup vekâleti Mehmed Bey b. Abdi ve Kasım b. Mustafa nâm kimesneler şehâdetleri ile şer‘an vekâleti sâbite olan Osman Efendi b. Mehmed nâm kimesne meclis-i şer‘-i şerîfde medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Kemhacıbaşı mahallesinde sâkine Fâtıma bt. Mustafa nâm hâtun muvâcehesinde bi’l-vekâle üzerine da‘vâ ve takrîr-i kelâm edip müvekkilim mezbûr Hasan Ağa’nın mülkü olup yeşil çuka kaplı sırt samur kürkünü mezbûr Fâtıma Hâ[tu]n alâ tarîki’l-vedî‘a yedine def‘ ve teslîm etmekle hâlâ zikr olunan kürkü bi’l-vekâle mezbûre Fâtıma’dan müvekkilim için taleb ederim suâl olunup takrîri tahrîr olunmak murâdımdır dedikde gıbbe’s-suâl mezbûre Fâtıma Hâtun cevâbında müvekkil-i mezbûr Hasan Ağa bundan akdem vefât edip zimmetinde mütekarrir ve ma‘kūdun aleyh iki yüz esedî guruş mehr-i müeccel hakkım olan zevcim el-Hâc Mehmed’in terekesinden kıymetleri iki yüz guruşdan mütecâviz muhallefâtını ahz ve kabz ettiğini huzûr-ı müslimînde ikrârdan sonra mezkûr kürkü tereke-i müteveffâ-yı mezbûrdan ahz ve kabz eylediği meblağ-ı merkūm mukābelesinde rehin vaz‘ etmiş[im]dir deyû redd-i cevâb eyledikde gıbbe’l-istintâk vekîl-i mezbûr müvekkil-i mûmâ-ileyh Hasan Ağa’nın sâlifü’l-beyân kürkü hâlâ mezbûre Fâtıma Hâtun’un yedinde vech-i muharrer üzre mevcûd olduğunu ikrâr ettiğinin takrîri tahrîr ve yedine def‘ ve teslîm olunmasını taleb etmeğin mezbûre Fâtıma Hâtun’un vech-i mübeyyen üzre olan ikrârı hıfzan li’l-makāl ketb ve tahrîr ve vekîl-i mezbûr yedine def‘ ve teslîm olunmuşdur. Hurrire fî Receb li sene tis‘în ve elf. Şuhûdü’l-hâl: Mehmed Çelebi b. Bâli, Ali b. Hasan, Mehmed Beşe b. Abdullah, Mehmed b. Eyyûb.