Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 103 Hüküm no: 53 Orijinal metin no: [10a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdurrahman Bey b. Mustafa’da kimsenin alacağının kalmadığı Havâss-ı Aliyye kazâsına tâbi‘ nefs-i nâhiye-i Küçükçekmece kasabası ahâlîsinden Paskal v. Todori ve İspandon v. Kanaki ve Yorgo v. Yani ve yine kazâ-i mezkûra tâbi‘ kurâ-yı Suyolcuyân’dan Küçükköy nâm karye ahâlîsinden Biharez? Yorgi v. Yani ve Burgaz nâm karye sükkânından Yorgi v. Nikola ve Palaş v. Aleksandri ve Yorgi v. Pandazi ve Foti v. Tanaş ve kurâ-yı Çekmece’den Ayas Ağa nâm karye sâkinlerinden Ahmed Halîfe b. Mehmed el-İmâm ve Kağıdhâne nâm karye sükkânından Abdülgaffâr Halîfe b. Mehmed el-İmâm ve Mehmed b. Ali el-Müezzin ve Yapa nâm karyeden Yorgi v. Kosta ve Soğanlı nâm karyeden Todos v. Todori ve Nifos nâm karyeden Dimitri v. Paskal ve Litros nâm karyeden Dimitri v. Mihal ve Alibey nâm karyeden İsmail b. Mahmud ve Safra nâm karyeden Manol v. Lanbo meclis-i şer‘-i hatîr-i lâzımü’t-tevkīrde nâhiye-i mezkûre ile kurâ-yı merkūmeden Davudpaşa menzili için üç yüz araba otluk iştirâsına emr-i şerîf-i âlîşân ile memûr olan işbu râfi‘ü’l-kitâb Abdurrahman Bey b. Mustafa nâm kimesne mahzarında her biri tav‘an ikrâr-ı tâm ve takrîr-i kelâm edip menzil-i mezkûre nakl ile her araba ikişer yüz vakıyye gelip her arabası için seksen akçeden cem‘an üç yüz araba otluk iştirâ ve menzil-i mezbûra nakl olunmak üzre taraf-ı mîrîden mübâşir-i merkūm Abdurrahman Bey yediyle irsâl olunan yirmi dört bin akçeyi mübâşir-i mezbûr Abdurrahman Bey yedinden bi’t-tamâm ve’l-kemâl ahz ve kabz eyledik meblağ-ı mezkûrdan mübâşir-i mezbûr yedinde bir akçe ve bir habbe bâkī kalmadı dediklerinde gıbbe’t-tasdîki’l-mu‘teber mâ vaka‘a bi’l-ibtigā kayd olundu. Fi’l-yevmi’s-sâbi‘ aşer min şehri Recebi’l-ferd li sene tis‘în ve elf. Şuhûdü’l-hâl: Mehmed Efendi b. Nasuh, Abdüsselâm Efendi b. Nasuh, Seyyid Ârif Çelebi b. Mustafa, Hüseyin Çelebi b. Ali.