Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 103 Hüküm no: 54 Orijinal metin no: [10a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sadaret mektupçusu Mustafa Efendi’nin evine su tahsisi Hâlâ revnak-efzâ-yı sadâret-i kübrâ ve letâfet-bahşâ-yı vezâret-i uzmâ olan vezîr-i âsaf-nişân, refî‘ü’l-kadr ve’l-mekân, menba‘-ı ayn-ı inâyet ve ihsân, mukassım-ı erzâk-ı kâffe-i cihân ve yenbû‘ü’l-mehâsin ve’ş-şiyem, metbû‘ü’l-meşâhir bi’l-kerem devletlü ve âtıfetlü sadr-ı ekrem [ve] vezîriâzam hazretlerinin mektûbculukları hizmet-i aliyyelerinde olup işbu kitâb-ı sıhhat-nisâbın sâhibi olan umdetü erbâbi’t-tahrîr ve’l-kalem, zübdetü ashâbi’t-tastîr ve’r-rakam, zü’l-kadri’r-refî‘ ve’l-izzi’l-menî‘ izzetlü Mustafa Efendi b. Hüseyin Ağa taraf-ı bâhirü’ş-şereflerinde husûs-ı âti’l-beyâna vekîl-i sâbitü’l-vekâleleri olan fahrü’l-eşbâh Hüseyin Efendi b. Yusuf meclis-i şer‘-i şerîf-i enverde bi’l-vekâle takrîr-i kelâm ve ta‘bîr ani’l-merâm edip müvekkilim mûmâ-ileyh Mustafa Efendi hazretleri Havâss-ı Aliyye kazâsına tâbi‘ Müderrisköyü demekle ma‘rûfe karye sınırı dâhilinde Kadıçayırı demekle şehîr mevzi‘de kendi mallarıyla on iki bacalı ve taht-ı arzdan lağımlar ve kanavât ile cem‘ ve tahsîl ettirdikleri mâ’ın üzerine varılıp ba‘de’l-keşf ve’l-mu‘âyene erbâbı beyninde mu‘tâd-ı kadîm üzre vezn ve ayâr ve tahmîn-i sahîh ile tahmîn olunmak müvekkil-i müşârün-ileyhin murâdıdır dedikde bu fakīr ve Hâssa su nâzırı olan mefharü’l-emâsil ve’l-ekârim Mehmed Ağa b. Abdülmennân ve hâssa su yolcuları bölükbaşılarından el-Hâc İbrahim b. Murad ve Usta Yusuf b. Abdullah ve sâir zeyl-i vesîkada muharrerü’l-esâmî müslimîn ile mevzi‘-i mezkûrda zikr olunan [mâ’ın] [10b] üzerine varıp sâlifü’l-beyân zeyl-i kitâbda isimleri muharrer olup husûs-ı mezbûra [vukūf] ve şu‘ûru olan müslimîn huzûrlarında tarz-ı ma‘rûf ve semt-i me’lûf ve vech-i mu‘tâd üzre vezn ve tahmîn-i sahîh ile tahmîn olundukda mevzi‘-i mezkûrda kâmil üç masura su mevcûd cereyân ettiği mu‘âyene ve müşâhede olundukdan sonra zikr olunan üç masura suyu ol mevzi‘den Halil Efendi suyuna andan merhûm ve mağfûrun-leh Sultan Süleyman Hân [hazretleri] suyu yoluna bi izni’l-mütevellî ilhâk ve idrâc ve bir masurası hakk-ı mecrâ alıkonulup bâkī iki masura su müvekkil-i mûmâ-ileyh Mustafa Efendi hazretlerinin mahmiye-i İstanbul’da Saman veren denmekle ma‘rûf Hoca Sinan mahallesinde vâki‘ mülk menzillerine icrâ olunmak üzre icmâ‘ ve ittifâk eylelediklerinde mâ cerâ alâ hâze’l-minvâl gıbbe’l-ibtigā ketb olundu. Fi’l-yevmi’l-hâmis aşer min şehri Recebi’l-mürecceb li sene tis‘în ve elf. Şuhûdü’l-hâl: Fahrü’l-eşbâh el-Hâc Hüseyin Ağa b. Halil mütevellî-i Sultan Mehmed Hân, İbrahim Efendi b. Yusuf Ağa vekîl-i mütevellî-i Sultan Süleyman Hân, celeb Mehmed Halîfe b. Abdullah, Osman (…), es-Seyyid Mehmed Çelebi b. Abdurrahman, Lütfullah Efendi b. Abdurrahman, Mustafa Ağa b. Abdülmennân Emîn-i Darbhâne, Mesud Efendi b. Ahmed, Abdullah Bey b. Abdullah, Mehmed Ağa b. İbrahim, İbrahim Ağa b. Yusuf Reis-i nakkāş, Mustafa Bey b. Receb, Ahmed Bey b. Mustafa, Ahmed Efendi b. Musa (…), Mehmed Halîfe b. Mustafa Müezzin-i Samanveren, Mehmed b. Hasan sâkin-i Samanveren, Osman Beşe b. Ahmed, Mehmed Çelebi b. Receb, Mustafa Efendi b. Mehmed (…) [Hoca] Hamza, el-Hâc Ali Ağa b. Yakub Teberdâr-ı hâssa, Mehmed Çelebi b. Ali sâkin-i Hoca Hamza, Hasan Ağa b. Mehmed sâkin-i mahalle-i mezbûre, Yusuf Ağa b. Abdullah sâkin-i mahalle-i mezbûre, el-Hâc Ömer b. Ebâ Bekir sâkin-i mahalle-i mezbûre, Ahmed b. Muharrem sâkin-i mahalle-i mezbûre, İsmail Çelebi b. Şaban sâkin-i mahalle-i mezbûre, Halil Çelebi b. Şaban an mahalleti mezbûre.