Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 105 Hüküm no: 55 Orijinal metin no: [10b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sadaret mektupçusu Mustafa Efendi’nin evine su tahsisi Hâlâ revnak-efzâ-yı sadâret-i kübrâ ve letâfet-bahşâ-yı vezâret-i uzmâ olan vezîr-i âsaf-nişân, refî‘ü’l-kadr ve’l-mekân, menba‘-ı ayn-ı inâyet ve ihsân, mukassım-ı erzâk-ı kâffe-i cihân ve yenbû‘ü’l-mehâsin ve’ş-şiyem, metbû‘ü’l-meşâhir bi’l-kerem devletlü ve sa‘âdetlü sadr-ı ekrem ve vezîriâzam hazretlerinin mektûbculukları hizmet-i aliyyelerinde olup işbu kitâb-ı sıhhat-nisâbın sâhibi olan umdetü erbâbi’t-tahrîr ve’l-kalem, zübdetü ashâbi’t-tastîr ve’r-rakam, zü’l-kadri’r-refî‘ ve’l-câhi’l-menî‘ izzetlü Mustafa Efendi b. Hüseyin Ağa taraf-ı bâhirü’ş-şereflerinden husûs-ı âti’l-beyâna vekîl-i sâbitü’l-vekâleleri olan fahrü’l-eşbâh Hüseyin Efendi b. Yusuf meclis-i şer‘-i şerîf-i enverde bi’l-vekâle takrîr-i kelâm ve ta‘bîr ani’l-merâm edip Havâss-ı Aliyye kazâsına tâbi‘ Müderrisköyü demekle ma‘rûfe karye sınırı dâhilinde Kadıçayırı demekle şehîr mevzi‘de su cem‘ ve tahsîl etmek üzre on üç aded baca hafr olunup mürûr-ı eyyâm ile hafr ettiren nâ-ma‘lûm ve mârrü’z-zikr bacaların dördü dolup dokuzu dahi harâb olmağın müvekkil-i mûmâ-ileyh Mustafa Efendi hazretleri zikr olunan bacaları kendi malından müceddeden ta‘mîr ve termîm ve lağımların tathîr ve bir mikdâr su cem‘ ve tahsîl ettirmeğin, hâlâ üzerine varılıp ba‘de’l-keşf ve’l-mesâha mu‘âyene ve müşâhede ve tahmîn-i sahîh ile mu‘tâd-ı kadîm üzre vezn ve ayâr ve ne mikdâr akçe harc ve sarf olunduğu dahi takvîm ve tahmîn olunmak müvekkil-i müşârün-ileyhin murâdıdır dedikde bu fakīr ve hâssa su nâzırı olan mefharü’l-emâsil ve’l-akrân Mehmed Ağa b. Abdülmennân ve hâssa su yolcuları bölükbaşılarından el-Hâc İbrahim b. Murad ve Usta Yusuf b. Abdullah ve sâir zeyl-i vesîkada muharrerü’l-esâmî olup husûs-ı mezkûre vukūf ve şu‘ûru olan müslimîn ile mevzi‘-i mezbûrda zikr olunan mâ’ın üzerine varıp keşf ve mu‘âyene ve mesâha-i sahîha ile mesâha ve tahmîn eyledikde on sekiz kulaç hâlî bacaların beher kulacı yüz doksan bir akçeden üç bin dört yüz yirmi ve iki yüz altmış dört kulaç kesme lağımın beher kulacı kezâlik yüz doksanar akçeden elli bin yüz altmış akçe ve beher altı yolluk künkün kıymeti sâir levâzımıyla ve su yolcular ücretleriyle otuzar akçeden beş yüz doksan yolluk künk kıymeti on yedi bin yedi yüz akçe ki cem‘an müvekkil-i mûmâ-ileyhin sâlifü’l-beyân su yollarının ve bacalarının ta‘mîr ve termîmine harc ve sarfı yetmiş bir bin iki yüz seksen akçeye bâliğ olduğuna husûs-ı mezbûre vukūf ve şu‘ûru olan mûmâ-ileyhim hâssa su nâzırı ve su yolcuları ittifâk ettiklerinden sonra sâlifü’z-zikr su vech-i mu‘tâd üzre vezn ve ayâr olundukda kâmil iken su cereyân ettiği mu‘âyene ve müşâhede eylelediklerinde sâlifü’l-beyân iki masura suyu ol mevzi‘e karîb Halil Efendi suyuna andan merhûm ve mağfûrun-leh Sultan Süleyman Hân [su] yoluna bi izni’l-mütevellî ilhâk ve idrâc ve buçuk masurası hakk-ı mecrâ alıkonuldukdan sonra bâkī kalan bir buçuk masura su müvekkil-i mûmâ-ileyh Mustafa Efendi hazretleri murâd eyledikleri mahalden ifrâz ve mahmiye-i İstanbul’da Samanveren demekle ma‘rûf Hoca Sinan mahallesinde vâki‘ mülk menzillerinde icrâ olunmak üzre icmâ‘ ve ittifâk eylediklerinde mâ cerâ gıbbe’l-ibtigā ketb olundu. Fi’l-yevmi’l-hâmis aşer min şehri Recebi’l-mürecceb li sene tis‘în ve elf. Şuhûdü’l-hâl: Es-Sabıkūn.