Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 106 Hüküm no: 56 Orijinal metin no: [11a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Avraham b. Yasef’in evinin satılarak küçük çocuklarının ihtiyacına harcanması Havâss-ı Aliyye kazâsı a‘mâlinden kasaba-i Hasköy’de Kiremitçi Ahmed Çelebi mahallesinde sâkin iken bundan akdem hâlik olan Avraham v. Yasef’in verâseti zevce-i metrûkesi Lisaro bt. İlya nâm Yahudiye ile sulbiye kızı Maryam ve sulbî oğulları İstefani ve Yasef ve Mesih nâm sagīrlere münhasıra olduğu şer‘an zâhir ve mütebeyyin oldukdan sonra hâlik-i mezbûr Avraham helâkinden on gün mukaddem ba‘de helâkihî sagīrûn-ı mezbûrûna intikāl-i âdî ile intikāl eden vakf menzilini ve sâir tereke-i hâlik-i mesfûrdan kalîl ve kesîr sagīrûn-ı mezbûrûna isâbet eden eşyâlarını ahz ve kabza ve iktizâ ederse sagīrûnun zarûret-i nafakaları için bedel-i ma‘lûmu mukābelesinde menzil-i mezkûru âhara ferâğ ve tefvîze vasiyy-i muhtâr nasb ve ihtiyâr eyledikde râfi‘-i hâze’r-rakīm Ispanakçı Murdehay v. Salamon nâm Yahudi meclis-i şer‘-i şerîfde takrîr-i kelâm edip sâbıkan Haremeyn-i şerîfeyn mukāta‘acısı olan Ali Efendi vakfı’ndan olup mahalle-i mezbûrede vâki‘ bir tarafı İlyazor v. İshak mülkü ve bir tarafı Yahud tâifesinin bî‘ası ve iki tarafı tarîk-i hâs ile mahdûd büyût-ı adîdeyi müştemil vakf menzilden gayrı hâlâ sagīrûn-ı mezbûrûnun ism-i mâl ıtlâk olunur şeyleri olmamağla nafaka ve kisveye eşedd-i ihtiyâc ile muhtâc olduklarından mâ‘adâ menzil-i mezkûr hâlâ harâba dahi müşrif olmağla menzil-i mezkûr ma‘rifet-i mütevellî ile bedel-i ma‘lûm mukābelesinde âhara tefvîz ve ferâğ olunup bedel-i ma‘lûm mukābelesinde âhara tefvîz ve ferâğ olunup bedel-i ma‘lûm ba‘de’l-ahz irbâh ve istirbâhdan sonra hâsıl olan ribhi sagīrûn-ı mezbûrûnun nafaka ve kisvelerine harc ve sarf olunmak sagīrûn-ı merkūmûn hakkında her vechile enfa‘ olmağın menzil-i mezkûru mütevellîsi izniyle bedel-i ma‘lûm mukābelesinde âhara vesâyet-i mahkiyem hasebiyle ferâğ ve tefvîz ve bedelini ba‘de’l-ahz irbâha ve hâsıl olan ribhini dahi sagīrûn-ı mezbûrûnun nafaka ve kisvelerine harc ve sarfa taraf-ı şer‘-i enverden izin taleb ederim dedikde kaziyye minvâl-i muharrer üzre olduğu tâife-i mezbûreden işbu hâzırûn bi’l-meclis Danyal v. Mosi ve Salamon v. Yako ve Yehud v. Yasef ve İlya v. Mosi nâm Yahudilerden istihbâr olundukda sagīrûn-ı mesfûrûn nafaka ve kisveye eşedd-i ihtiyâc ile muhtâc olmağın menzil-i mezkûr minvâl-i meşrûh üzre âhara bedel-i ma‘lûme tefvîz ve bedeli dahi irbâh ve hâsıl olan ribhi sagīrûn-ı mezbûrûnun nafaka ve kisvelerine harc ve sarf olmak sagīrûn-ı mezbûrûn hakkında her vechile enfa‘dır, deyû mezkûr Yahudilerin her biri haber vermeğin menzil-i mahdûd-ı mezkûru bedel-i ma‘lûmu ile âhara tefvîze ve bedelini ahz ve kabz ve irbâh ve hâsıl olan ribhini sagīrûn-ı mezbûrûnun nafaka ve kisvelerine harc ve sarfa vasiyy-i mezbûre nasb edip kıbel-i şer‘den izin birle mâ vaka‘a kayd şüd. Fi’l-yevmi’s-sâlis aşer min şehri Recebi’l-mürecceb li sene tis‘în ve elf. Şuhûdü’l-hâl: (…) b. Eyüb, Mehmed b. Mahmud, Hüseyin b. Abdullah, Ali b. Abdullah, Abdullah b. Hasan.