Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 107 Hüküm no: 57 Orijinal metin no: [11a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Abdullah’ın kendisine ait dörtte bir ev hissesini Halil Efendi’ye satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Bıçakçı Ferhad mahallesinde sâkine Belkıs bt. Abdullah nâm hâtun tarafından menzil-i âti’z-zikrde olan rub‘ hisse-i şâyi‘asını bey‘a ve semenini kabza ve kendiye îsâle ahz u kabz ve îsâl mütevakkıf olduğu umûrun küllîsine vekîl-i müseccel olan el-Hâc Ahmed b. Abdullah nâm kimesne meclis-i şer‘-i hatîr-i lâzımü’t-tevkîrde, işbu râfi‘ü’l-kitâb Halil Efendi b. Haydar nâm kimesne mahzarında bi’l-vekâle ikrâr ve takrîr-i kelâm edip müvekkilem merkūme Belkıs Hâtun silk-i mülkümde olup mahalle-i mezbûrede bir tarafdan sâbıkan yeniçeri efendisi olan Mustafa Efendi mülkü ve bir tarafdan Vefâdar bt. Abdullah Hâtun mülkü ve bir tarafdan ba‘zan Havva bt. Mehmed nâm hâtun mülkü ve ba‘zan el-Hâc Ahmed b. Abdullah mülkü ve ba‘zan mezbûr Halil Efendi’nin mülkü ve bir tarafdan tarîk-i hâs ile mahdûd iki tahtânî oda ve bir sagīr oda ve bi’r-i mâyı ve cüneyneyi müştemil mülk menziline olan rub‘ hisse-i şâyi‘amı mezbûr Halil Efendi’ye bin sekiz yüz fıddî râyic fi’l-vakt akçeye tarafından îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr bin sekiz yüz akçeyi vekâletim hasebiyle mezbûr Halil Efendi yedinden tamâmen ahz ve kabz eyledim ba‘de’l-yevm sâlifü’z-zikr rub‘ hisse mezbûr Halil Efendi’nin mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’s-sânî aşer min Recebi’l-mürecceb li sene tis‘în ve elf. Şuhûdü’l-hâl: (…) Efendi b. Süleyman, Yusuf Çelebi b. Mehmed Münâdî, Mehmed Çelebi b. Hüseyin el-Müezzin, Mustafa Halîfe b. Mehmed, Mehmed b. Eyüb.