Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 108 Hüküm no: 58 Orijinal metin no: [11a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. İstati’nin bağını kardeşi Nikola’ya satması Vilâyet-i Rumeli’nde Yaşağaç kazâsına tâbi‘ Ziyoz? nâm karye ahâlîsinden Dimo v. İstati nâm zimmî meclis-i şer‘-i şerîfde râfi‘-i hâze’r-rakīm Yani v. Panayot nâm zimmî tarafından ikrâr-ı âti’l-beyânı tasdîke vekîl olup nehc-i şer‘î üzre vekâleti sâbite olan li ebeveyn karındaşı Nikola nâm zimmî muvâcehesinde ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik olup karye-i mezbûrede vâki‘ bir tarafı Papa Şino v. Yani bağı ve bir tarafı Hristo v. Rizo bağı ve bir tarafdan Yani v. Rizo bağı ve bir tarafı ba‘zan Yani v. Jale bağı ve ba‘zan tarîk-i âm ile mahdûd bir kıt‘a mülk bağımı, cemî‘ tevâbi‘ ve levâhıkı ile müvekkil-i mezbûr Yani’ye iki bin fıddî râyic fi’l-vakt akçeye bey‘ ve temlîk edip ol dahi minvâl-i muharrer üzre iştirâ ve temellük ve kabûl eylediğinden sonra semeni olan meblağ-ı mezbûr iki bin akçeyi müvekkil-i mersûm yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan bir kıt‘a bağımda vechen mine’l-vücûh alâka ve medhalim yokdur müvekkil-i mezbûr Yani’nin mülk-i müşterâsı olmuşdur keyfe mâ yeşâ’ mutasarrıf olmağla mahallinde zabt ve tasarrufa müvekkil-i mezbûru tarafımdan taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb kayd şüd. Fi’l-yevmi’l-ışrîn min şehri Recebi’l-ferd li sene tis‘în ve elf. Şuhûdü’l-hâl: Mehmed b. Eyüb, Hasan b. Abdullah, Mehmed b. Mahmud, Ali b. Abdullah, Hüseyin b. Ali.