Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 108 Hüküm no: 59 Orijinal metin no: [11a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. ] Âişe bt. Abdullah’ın ev hissesini kardeşi Müstecab’a satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Sofular mahallesi sükkânından iken bundan akdem vefât eden (…) Efendi b. Abdi nâm müteveffânın verâseti zevce-i metrûkesi Âişe bt. Abdullah nâm hâtun ile li ebeveyn er karındaşı Müstecâb nâm kimesneye münhasıra olduğu şer‘an zâhir ve müte‘ayyin oldukdan sonra mezbûre Âişe meclis-i şer‘-i hatîr-i lâzımü’t-tevkīrde işbu râfi‘ü’l-kitâb merkūm Müstecâb mahzarında bi tav‘ihâ ikrâr-ı tâm ve takrîr-i kelâm edip [11b] zevcim müteveffâ-yı mezbûrun muhallefâtından olup mahalle-i mezbûrede vâki‘ bir tarafdan mahalle-i mezbûrede imâmına meşrûta vakf menzil ve bir tarafdan tarîk-i âm ve iki tarafdan Ali Çavuş b. Mustafa mülkü ile mahdûd iken fevkānî ve bir tahtânî odaları ve bir tahta-pûş ve bi’r-i mâyı ve bir asma ağacını ve bir mikdâr avluyu müştemil mülk menzilin rub‘u bana ve selâse erbâ‘ı mezbûr Müstecâb’a irsen isâbet ve intikāl etmeğin hâlâ menzil-i mahdûd-ı mezkûrda olan rub‘ hisse-i şâyi‘amı mezbûr Müstecâb’a yirmi beş kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabz ve kabûl eyledikden sonra semeni olan meblağ-ı mezkûr yirmi beş guruşu mezbûr Müstecâb yedinden bi’t-tamâm ve’l-kemâl ahz ve kabz eyledim Ba‘de’l-yevm menzil-i mahdûd-ı mezkûrda olan rub‘ hissemde vechen mine’l-vücûh alâka ve medhalim kalmadı mecmû‘-ı menzil-i merkūm irsen ve şirâen mezbûr Müstecâb’ın mülk-i mahzı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ alâ hâze’l-minvâl bi’l-ibtigā kayd şüd. Fi’l-yevmi’s-sâmin aşer min şehri Recebi’l-mürecceb li sene tis‘în ve elf. Şuhûdü’l-hâl: Ahmed Efendi b. Mehmed, Fahrü’l-kuzât İbrahim Efendi b. Resul, Ahmed Efendi b. Mustafa, Mehmed Efendi b. Veliyyüddin, Süleyman Çelebi b. Ali, Ali b. İslâm.