Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 109 Hüküm no: 60 Orijinal metin no: [11b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. ] Âişe bt. Ramazan ile Hüseyin Çelebi b. Abdullah’ın boşanması Mahmiye-i İstanbul hısnı ebvâbından Eğrikapı dâhilinde Avcıbey mahallesi sâkinelerinden Âişe bt. Ramazan Hâtun’un li ebeveyn er karındaşı ve tarafından husûs-ı âti’l-beyânı ikrâra vekîl olup hasm-ı câhid mahzarında mezbûrenin zâtını ma‘rifet-i şer‘iyye ile ârifân olan Davud Ağa b. Mehmed ve İsmail Bey b. Mustafa nâm kimesneler şehâdetleriyle şer‘an vekâleti sâbite olan Mustafa Çelebi b. Ramazan nâm kimesne meclis-i şer‘-i hatîr-i lâzımü’t-tevkīrde müvekkile-i mezbûrenin zevc-i mutallıkı işbu râfi‘ü’l-kitâb Sâ‘atî Hüseyin Çelebi b. Abdullah nâm kimesne tarafından ikrâr-ı câ’i’z-zikri tasdîke vekîl olup bimâ hüve tarîkü’s-sübût şer‘an vekâleti sâbite olan Sâ‘atî Mehmed Çelebi b. Ahmed nâm kimesne mahzarında bi’l-vekâle ikrâr ve takrîr-i kelâm edip karındaşım müvekkilem merkūme Âişe Hâtun’u zevci müvekkil-i mezbûr Sâ‘atî Hüseyin Çelebi tatlîk etmekle müvekkile-i mezbûre Âişe Hâtun müvekkil-i merkūm Hüseyin Çelebi zimmetinde mütekarrir ve ma‘kūdun aleyh olan dört bin akçe mehr-i müeccel hakkı ile nafaka-i iddet-i mu‘ayyene ve me’ûnet-i süknâsı için dahi sekiz yüz akçe ki cem‘an dört bin sekiz yüz akçeyi müvekkil-i mezbûr Hüseyin Çelebi yedinden bi’t-tamâm ve’l-kemâl ahz ve kabz edip hukūk-ı zevciyyete ve gayra müte‘allika da‘vâdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’l-ibtigā ketb olundu. Fi’l-yevmi’s-sâmin aşer min şehri Recebi’l-mürecceb li sene tis‘în ve elf. Şuhûdü’l-hâl: Mustafa Çelebi b. Nasuh, Ahmed Çelebi, Mehmed b. Eyüb, Hasan b. Abdullah, Ali b. Abdullah.