Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 110 Hüküm no: 61 Orijinal metin no: [11b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çömlekçi Bâli b. Mıgırdiç’ın Hacı Mehmed b. Ali’ye olan borcunu ödemesi Mahrûse-i Üsküdar kazâsına tâbi‘ nefs-i Karamürsel sükkânından râfi‘-i hâze’l-kitâb el-Hâc Mehmed b. Ali nâm kimesne meclis-i şer‘-i şerîfde medîne-i Hazret-i Ebâ Eyyûb-i Ensârî’de vâki‘ çömlekçi tâifesinden Bâli v. Mıgırdiç nâm Ermeni muvâcehesinde üzerine da‘vâ ve takrîr-i kelâm edip târih-i kitâbdan bir sene mukaddem her keyl birer esedî guruş olmak üzre mesfûr Bâli’ye irsâl eylediğim elli üç keyl un semeninden on beş esedî guruş ve vakıyyesi beynimizde ma‘lûm zeytin bağıyla mahlût Karamürsel zeytini semeninden dahi altı yüz akçe ki cem‘an mesfûr Bâli zimmetinde on beş esedî guruş ile altı yüz akçe hakkım bâkī kalmışidi hâlâ taleb eylediğimde edâdan imtinâ‘ eder suâl olunup meblağ-ı bâkī-i mezkûr alıverilmesi matlûbumdur dedikde gıbbe’s-suâl merkūm Bâli vech-i muharrer üzre unu ve zeytini ahz ve kabzını ve kabûlünü ikrâr lâkin sâlifü’z-zikr un ile zeytinin semenlerinden ancak buçuk guruş deynim bâkī kalıp mâ‘adâyı bi’t-tamâm mezbûr el-Hâc Mehmed’e edâ ve teslîm eyledim deyû def‘le mukābele edicek gıbbe’l-istintâk ve akībe’l-inkâr, mesfûr Bâli’den def‘-i mezkûrunu mübeyyine beyyine taleb olundukda bi hasebi’ş-şer‘i’ş-şerîf şehâdeti makbûle olup şâhid ityânından izhâr-ı acz ile istihlâf etmeğin sâlifü’l-beyân un ile zeytinin semenlerini bi’t-tamâm merkūm Bâli’den mezbûr el-Hâc Mehmed ahz ve kabz etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebiyle meblağ-ı bâkī on beş esedî guruş ile altı yüz akçeyi mezbûr el-Hâc Mehmed’e edâ ve teslîme mesfûr Bâli’ye tenbîh birle mâ vaka‘a bi’t-taleb ketb olundu. Fi’l-yevmi’s-sâmin aşer min şehri Recebi’l-mürecceb li sene tis‘în ve elf. Şuhûdü’l-hâl: Davud Ağa b. ( ), Mehmed Çelebi b. Ali, Ali Çelebi b. Hüseyin, Mehmed Çelebi b. Ahmed ve gayruhüm.