Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 110 Hüküm no: 62 Orijinal metin no: [11b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey’in bulduğu atın sahibi çıkıncaya kadar bakılması Mahmiye-i İstanbul’da bi’l-fi‘l gümrük emîni olan iftihârü’l-emâcid ve’l-ekârim Hüseyin Ağa tarafından Havâss-ı Aliyye kazâsından Küçük Hâslar’ın hâlâ subaşısı olmağla sâlifü’z-zikr Küçük Hâslar sınırında vâki‘ olan beytülmâl ve avâbık ve yavanın ahz u kabzına memûr olan işbu râfi‘ü’l-kitâb Mehmed Bey b. Hasan nâm kimesne meclis-i şer‘-i şerîfe gelip takrîr-i kelâm ve bast-ı merâm edip işbu târih-i kitâb günü kazâ-i mezkûre tâbi‘ Papas nâm karye ahâlîsinden olup hâzır bi’l-meclis Sarı Mehmed b. Mehmed nâm kimesne işbu mevcûd bi’l-meclis üzerine neftî çuka kaplı sırmalı bir köhne iki ve sırmalı kırmızı köhne zilpûş ve bir sîm Haydarî raht ve bir çift altın kûp? üzengisi olan bir re’s kırat ahz edip yava olmak [üzre] bana teslîm ben dahi ahz ve kabz eyledim hâlâ sâhibi zuhûr edinceye değin sâlifü’z-zikr at için kıbel-i şer‘den kifâyet mikdârı nafaka takdîr olunmak matlûbumdur dedikde hâkim-i muvakki‘-i sadr-ı kitâb -tûbâ-leh ve hüsnü me’âb- dahi zikr olunan at için târih-i kitâbdan yevmî on altışar akçe nafaka farz ve takdîr eyleyip meblağ-ı mefrûz-ı mezkûru harc ve sarfa ve vakt-i zarûretde istidâneye ve lede’z-zafer rücû‘a izin birle mâ hüve’l-vâki‘ alâ hâze’l-minvâl gıbbe’l-ibtigā ketb olundu. Fi’l-yevmi’l-hâmis min şehri Recebi’l-mürecceb li sene tis‘în ve elf. Şuhûdü’l-hâl: Süleyman Bey b. Mustafa sarrâc-ı hâssa, es-Seyyid Ârif Mehmed Çelebi b. Mustafa, Hüseyin Çelebi b. Ali Ser-bölük, Mehmed b. Eyyûb.