Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 112 Hüküm no: 64 Orijinal metin no: [12a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Ağa b. Ramazan’ın evini Rabia bt. Abdullah’a hibe etmesi Husûs-ı âti’l-beyânın mahallinde ketb ve tahrîri iltimâs olunmağın savb-ı şer‘-i münîrden mevlânâ Mehmed Efendi b. Nasuh irsâl olunup ol dahi medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Baba Haydar mahallesinde sâkin fahrü’l-emâsil ve’l-akrân Süleyman Ağa b. Ramazan Ağa’nın menziline varıp zeyl-i kitâbda muharrerü’l-esâmî cemâ‘at-i müslimîn huzûrunda akd-i meclis-i şer‘-i şerîf eyledikde mûmâ-ileyh Süleyman Ağa meclis-i ma‘kūd-ı mezkûrda zevce-i menkûhası işbu râfi‘atü’l-kitâb Râbia Hâtun bt. Abdullah tarafından husûs-ı âti’l-beyâna vekîl olup hasm-ı câhid mahzarında mezbûrenin zâtını ma‘rifet-i şer‘iyye ile ârifân olan Mehmed Çelebi b. Mehmed ve diğer Mehmed b. Ali şehâdetleriyle şer‘an vekâleti sâbite olan Murtaza Bey b. Ahmed nâm kimesne mahzarında tâyi‘an ikrâr-ı tâm ve takrîr-i kelâm edip hibe-i âtiyetü’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan Hasan Çelebi b. ( ) mülkü ve bir tarafı ba‘zan gümrükçü Halil Bey mülkü ve ba‘zan İbrahim Ağa b. ( ) mülkü ve bir tarafı âhar zevce-i menkûhalarım Rukiye ve Hatice nâm hâtunlar hibe ettiğim menziller ve bir tarafı tarîk-i âm ile mahdûd üç fevkānî oda ve bir sofa ve bir dehliz ve kameriye ta‘bîr olunur sofa ve ahır ve kenîf ve zât-ı eşcâr-ı müsmire ve gayr-ı müsmire bahçeyi müştemil menzilimi cemî‘ tevâbi‘ ve levâhıkı ile ba‘de’t-tahliyyeti’ş-şer‘iyye şurût-ı müfsideden âriye zevcem müvekkile-i mezbûre Râbia Hâtun’a hibe-i sahîha-i şer‘iyye ile hibe ve teslîm ve temlîk eylediğimden sonra vekîl-i mezbûr Murtaza Bey dahi meclis-i hibede menzil-i mahdûd-ı mezkûru müvekkilesi merkūme Râbia Hâtun için ittihâb ve tesellüm ve temellük ve kabz u kabûl eyledi ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalim kalmadı zevcem müvekkile-i mezbûre Râbia Hâtun’un mülk-i mevhûbudur keyfe mâ teşâ’ ve haysü mâ tahtâr mutasarrıfe olsun dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Ali b. Abdullah ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’l-ibtigā kayd şüd. Fi’l [yevmi]’s-sânî aşer min şehri Recebi’l-mürecceb li sene tis‘în ve elf. Şuhûdü’l-hâl: Es-Sâbikūn.