.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 113
Hüküm no: 65
Orijinal metin no: [12a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Süleyman Ağa b. Ramazan’ın evini Rukiye bt. Abdullah’a hibe etmesi

Husûs-ı âti’l-beyânın mahallinde ketb ve tahrîri iltimâs olunmağın savb-ı şer‘-i münîrden mevlânâ Mehmed Efendi b. Nasuh irsâl olunup ol dahi medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Baba Haydar mahallesi sâkinlerinden fahrü’l-emâsil ve’l-akrân Süleyman Ağa b. Ramazan’ın menziline varıp zeyl-i kitâbda muharrerü’l-esâmî müslimîn huzûrunda akd-i meclis-i şer‘-i mübîn eyledikde mûmâ-ileyh Süleyman Ağa meclis-i ma‘kūd-ı mezbûrda zevce-i menkûhası işbu râfi‘atü’l-kitâb Rukiye Hâtun bt. Abdullah tarafından husûs-ı âti’l-beyâna vekîl olup hasm-ı câhid mahzarında mezbûrenin zâtını ma‘rifet-i şer‘iyye ile ârifân olan Mehmed Çelebi b. Mehmed ve diğer Mehmed b. Ali şehâdetleriyle şer‘an vekâleti sâbite olan Murtaza Bey b. Ahmed nâm kimesne mahzarında tâyi‘an ikrâr-ı tâm ve takrîr-i kelâm edip hibe-i âtiyetü’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafı Hasan Efendi b. el-Hâc Veli mülkü ve bir tarafı âhar zevce-i menkûhalarım Râbia ve Hatice nâm hâtunlara hibe ettiğim menziller ve bir tarafı yine benim âhar mülküm olan sedli bahçem ve bir tarafı tarîk-i âm ile mahdûd iki fevkānî oda ve iki sofa ve dehliz ve üç aded bi’r-i mâyı ve zât-ı eşcâr-ı müsmire ve gayr-ı müsmire bahçeyi müştemil menzilimi cemî‘ tevâbi‘ ve levâhıkıyla ba‘de’t-tahliyyeti’ş-şer‘iyye şurût-ı müfsideden âriye zevcem müvekkile-i mezbûre Rukiye Hâtun’a hibe-i sahîha-i şer‘iyye ile hibe ve temlîk ve teslîm eylediğimden sonra vekîl-i mezbûr Murtaza Bey dahi meclis-i hibede menzil-i mahdûd-ı mezkûru müvekkilesi merkūme Rukiye Hâtun için ittihâb ve tesellüm ve temellük ve kabz u kabûl eyledi ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalim kalmadı zevcem müvekkile-i mezbûre Rukiye Hâtun’un mülk-i mevhûbudur keyfe mâ teşâ’ mutasarrıfe olsun dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Ali b. Abdullah ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a kayd şüd. Fi’l yevmi’s-sânî aşer min şehri Recebi’l-mürecceb li sene tis‘în ve elf.


Şuhûdü’l-hâl: Es-Sâbikūn.