Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 114 Hüküm no: 67 Orijinal metin no: [12b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hristo v. Kosta’nın ev ve bağlarını Ömer Beşe b. Abdullah’a satması Havâss-ı Aliyye kasabası nevâhîsinden Küçükçekmece nâhiyesine tâbi‘ Anbarlı nâm karye ahâlîsinden Hristo v. Kosta nâm zimmî meclis-i şer‘-i şerîfde işbu râfi‘ü’l-kitâb Ömer Beşe b. Abdullah nâm kimesne mahzarında bi’t-tav‘i’s-sâf ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup karye-i mezbûrede vâki‘ bir tarafdan Latan v. Yuvan nâm zimmî mülkü ve bir tarafdan Alagöz nâm zimmî mülkü ve iki tarafdan tarîk-i âm ile mahdûd iken fevkānî ve bir tahtânî odaları ve ahırı ve iki asma ağacı ve bir mikdâr avluyu müştemil mülk menzilimi cemî‘ hukūk ve merâfıkı ile yine karye-i mezbûre sınırı dâhilinde vâki‘ bir tarafı Kapıcı Mustafa Bey bağı ve bir tarafı Vizane v. Kosta bağı ve bir tarafı merkūm Latan bağı ve bir tarafı Manol v. Dimitri bağı ile mahdûd tahmînen bir dönüm bir kıt‘a bağ yine karye-i merkūme hudûdu dâhilinde vâki‘ bir tarafdan dere ve bir tarafdan merkūm Manol bağı ve iki tarafdan Sinan Ağa ta[r]lası ile mahdûd tahmînen bir dönüm bir kıt‘a bağ, yine karye-i mezbûre sınırı dâhilinde Karaağaç nâm mevzi‘de vâki‘ bir tarafı mezbûr Sinan Ağa tarlası ve bir tarafı merkūm Latan bağı ve iki tarafı İbrahim b. Hasan bağı ile mahdûd tahmînen bir dönüm bir kıt‘a bağ ki cem‘an üç kıt‘a mülk bağları, cemî‘ hukūk ve rüsûmuyla safka-i vâhide ile mezbûr Ömer Beşe’ye otuz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi minvâl-i muharrer üzre iştirâ ve tesellüm ve kabûl eyledikden sonra semeni olan meblağ-ı mezkûr otuz guruşu mezbûr Ömer Beşe yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan menzil ve bağlar mezbûr Ömer Beşe’nin mülk-i müşterâsı olmuşdur keyfe mâ yeşâ’ ve haysü mâ yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’s-sâlis ve’l-ışrîn min şehri Recebi’l-mürecceb li sene tis‘în ve elf. Şuhûdü’l-hâl: Mehmed b. Mustafa, İbrahim b. Ömer, Receb Efendi b. Yusuf el-İmâm bi mescid-i Takyeci, Ali Hoca b. ( ) el-İmâm, Hasan Beşe b. ( ), Mehmed b. Eyüb, Hasan b. Abdullah.