Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 115 Hüküm no: 68 Orijinal metin no: [12b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Ağazâde Mehmed’in annesi Hatice ile ortak mülklerini Süvari mukabelecisi Ali Efendi’ye satması Mahmiye-i İstanbul’da Sultan Bayezid kurbunda Yahni Kapan mahallesi sükkânından olup kendi tarafından asâleten yine mahalle-i mezbûrede sâkine vâlidesi Hatice bt. Rıdvan nâm hâtun tarafından mezbûre Hatice’nin menzil-i câ’i’z-zikrde olan nısf hisse-i şer‘iyyesini bey‘a ve semenini ahz ve kabza ve kendiye îsâle ve kabz ve îsâl mütevakkıf olduğu umûrun küllîsine vekîl olup hasm-ı câhid mahzarında mezbûrenin zâtını ma‘rifet-i şer‘iyye ile ârifân olan Abdi Efendi b. Mustafa ve Ahmed Çelebi b. Mustafa nâm kimesneler şehâdetleri ile şer‘an vekâleti sâbite olan Yusuf Ağazâde Mehmed Ağa asâleten ve vekâleten meclis-i şer‘-i şerîfde işbu kitâb-ı sıhhat nisâbın sâhibi olup bi’l-fi‘l atlı mukābelecisi olan umdetü erbâbi’t-tahrîr ve’l-kalem, zübdetü ashâbi’t-tastîr ve’r-rakam Ali Efendi b. Mustafa tarafından ikrâr-ı âti’l-beyânı tasdîke vekîl olup vekâleti mûmâ-ileyh Abdi ve Osman Efendi b. Mehmed şehâdetleri ile şer‘an sâbite olan umdetü’l-eşbâh Mustafa Çelebi b. Mahmud nâm kimesne mahzarında mezbûr Mehmed Ağa asâleten ve vekâleten ikrâr ve takrîr-i kelâm edip vâlidem ve müvekkilem mezbûre Hatice Hâtun ile ale’l-iştirâki’s-seviy silk-i mülk-i sahîhimde münselik olup medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Otakçılar kurbunda Mehmed Bey mahallesinde vâki‘ bir tarafı ba‘zan Mehmed Bey vakfı olan odaları ve ba‘zan el-Hâc Ali nâm sâhibü’l-hayrın evlâdına vakf ettiği odaları ve ba‘zan diğer el-Hâc Ali Bey evlâdına vakf ettiği odalar ve ba‘zan Mehmed Bey mescidi’ne mevkūfe odalar ve ba‘zan çömlekçi Osman mutasarrıf olduğu vakıf menzil ve iki tarafı Tatarkurduzâde Mustafa Ağa’nın çayırı ve bir tarafı tarîk-i âm ile mahdûd hâriciyyesi üç bâb fevkānî oda ve iki sofa ve bir ahır ve bir bâb tahtânî köşk ve dolab kapısı ve iki bi’r-i mâ ve harâba müşrif havuz ve muhavvata ve zât eşcâr-ı müsmire ve gayr-ı müsmire bahçeyi ve dâhiliyyesinde ba‘zan iki bâb fevkānî oda ve iki fevkānî sofa ve iki bâb tahtânî oda ve bir matbah ve bir kenîf ve ayazma ta‘bîr olunur bi’r-i mâyı müştemil mülk menzilimi cemî‘ tevâbi‘ ve levâhıkı ile müvekkil-i mûmâ-ileyh Ali Efendi’ye sekiz yüz esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm mûmâ-ileyh Ali Efendi dahi minvâl-i muharrer üzre iştirâ ve tesellüm ve kabz ve kabûl eyledikden sonra hudûd-ı mezkûre ile mahdûd menzil-i merkūm hudûdu dâhilinde vâki‘ merhûm Mehmed Bey vakfı’na her mâh on beşer akçe icâre-i müeccelesi olan tav‘an on bir zirâ‘ sekiz parmak ve arzen altı zirâ‘ on sekiz parmak bi hesâb-ı terbî‘î yetmiş iki zirâ‘ vakıf arsa üzerine mebnî bir sagīr tahtânî oda ve nısf ayazma ta‘bîr olunur bi’r-i mâ ile ma‘an ma‘rifet-i mütevellî ile asâlet ve vekâletim hasebiyle mûmâ-ileyh Ali Efendi’ye elli esedî guruş bedel mukābelesinde tefvîz bi’l-ferâğ edip mûmâ-ileyh Ali Efendi dahi vech-i muharrer üzre tefevvuz ve kabûl eyledikden sonra semen-i mezbûr ile bedel-i merkūmdan müctemi‘ olan sekiz yüz elli esedî guruşu mûmâ-ileyh Ali Efendi yedinden asâlet ve vekâletim hasebiyle bi’t-tamâm ve’l-kemâl ahz ve kabz edip meblağ-ı mezbûru beynimizde iktisâm eyledik ba‘de’l-yevm menzil-i mahdûd-ı mezkûrda alâka ve medhalim yokdur mûmâ-ileyh Ali Efendi’nin mülk-i müşterâsı ve mârrü’z-zikr arsa üzerine mebnî oda ve nısf hisse-i bi’r-i mâ dâhil-i taht-ı tasarrufu olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min şehri Recebi’l-ferd li sene tis‘în ve elf. Şuhûdü’l-hâl: Mehmed Efendi b. İbrahim, Mehmed Ali Çelebi b. Ramazan, Süleyman Bey el-Cündî, Abdullah Bey el-Cündî, Hüseyin Bey el-Cündî, Mehmed Efendi b. Hüseyin, Hüseyin Çelebi b. Ali, Mehmed b. Eyüb, Mehmed b. Mahmud.