Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 116 Hüküm no: 69 Orijinal metin no: [13a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi’nin mirası hususunda vârislerinin anlaştıkları Havâss-ı Aliyye kazâsı a‘mâlinden kasaba-i Hasköy’de Abdüsselâm mahallesinde sâkin iken bundan akdem hâlik olan Yorgi v. ( ) nâm zimmînin verâseti zevce-i metrûkesi Kudret bt. Yorgi ile sulbî kebîr oğulları Kosta ve Yamandi ile sulbiye kebîre kızı Kokana’ya münhasıra olup kable’l-kısmet mezbûre Kudret dahi hâlike olup verâseti oğulları mezbûre Kosta ve Yamandi ve kızı Kokana’ya münhasıra olduğu şer‘an zâhir ve mütebeyyin oldukdan sonra mezbûr meclis-i şer‘de babamız hâlik-i mezbûr ile vâlidemiz hâlike-i mezbûrenin her birinin muhallefâtına vâzı‘ü’l-yed olan karındaşı râfi‘ü’t-terkīm mezbûr Kosta muvâcehesinde ikrâr ve i‘tirâf edip babam ve vâlidem hâlikân-ı mesfûrândan irsen bana intikāl eden hisse-i şer‘iyyemi mezbûr Kosta’dan da‘vâ ve taleb eylediğimde beynimizde münâza‘ât-ı kesîre ve muhâsamât-ı kesîre vâkı‘a olmuşdu el-hâletü hâzihî beynimizde müslimûn-ı muslihûn tavassut etmekle beni alâ tarîki’t-tehârüci’ş-şer‘î mezbûr Kosta ile altı esedî guruş üzerine inşâ-i akd-i sulh eylelediklerinde ben dahi sulh-ı mezbûru kabûl ve bedel-i sulh olan meblağ-ı mezbûr altı esedî guruşu mezbûr Kosta yedinden bi’t-tamâm ahz ve kabz eyledim ba‘de’l-yevm babam ve vâlidem hâlikân-ı mesfûrânın muhallefâtlarına müte‘allik cemî‘ da‘vâdan mezbûr Kosta’nın zimmetini ibrâ-i âm ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min şehri Recebi’l-mürecceb li sene tis‘în ve elf. Şuhûdü’l-hâl: Yusuf Çelebi b. Mehmed, İbrahim b. Dilâver, Hüseyin b. Ali, Mehmed b. Eyüb ve gayruhüm mine’l-huzzâr.