Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 117 Hüküm no: 70 Orijinal metin no: [13a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Hüseyin’e borcu olan Mehmed b. Mehmed’in borcunu ödemesi Vilâyet-i Anadolu’da Erzurum kazâsı ahâlîsinden râfi‘ü’l-vesîka Hasan b. Hüseyin nâm kimesne meclis-i şer‘de Mehmed b. Mehmed mahzarında üzerine takrîr-i da‘vâ edip târih-i kitâbdan bir sene mukaddem her gün üç öğün ta‘âmı kendi ücretimden harc etmek üzre yevmî otuzar akçe ücret ile kırk iki gün mezbûr Mehmed’e saz ta‘bîr olunur otluk biçdim ve kendi emriyle sâir ırgadlarına dahi kendi malımdan beş buçuk guruş verdim ki cem‘an mezbûr Mehmed zimmetinde bin dokuz yüz yirmi akçe hakkımız olmuşidi beş yüz kırk akçesi dört buçuk guruş mukābelesinde bana bey‘ ettiği saz ta‘bîr olunur otluk kıymetine takās edip bâkī kalan bin üç yüz seksen akçe hakkımı taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl ve akībe’l-inkâr ve isre talebi’l-beyyine udûl-i müslimînden olup medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Kasımpaşa mahallesi sükkânından Mehmed b. Ali ve Ahmed b. İshak ve Ali b. Receb ve İbrahim b. Muharrem nâm kimesneler li ecli’ş-şehâde makām-ı kazâda hâzırûn olup isre’l-istişhâd fi’l-asl kazâ-i mezbûr Erzurum ahâlîsinden olup diyâr-ı âhara sefer etmeleri iktizâ etmekle meclis-i şer‘a huzûrları müte‘azzir olan Mustafa b. Ahmed ve Muharrem b. Yusuf nâm kimesneler müdde‘î-i mezbûr Hasan târih-i mezbûrda her gün üç öğün ta‘âmını kendi ücretinden iştirâ etmek üzre yevmî otuzar akçe ücretle kırk iki gün saz ta‘bîr olunur mezbûr Mehmed’in otluğunu biçdi mezbûr Mehmed’in emriyle mezbûr Hasan kendi malından mezbûr Mehmed’in sâir ırgadlarına beş buçuk guruş dahi edâ ve teslîm eyledi biz bu husûsa bu vech üzre şâhidleriz şehâdet dahi ederiz dediklerinden sonra mezbûrân Mustafa ve Muharrem’in her biri bizim huzûrumuzda her birimize siz dahi şâhid olun ve bizim her birimizin lisânından şehâdet eylen deyû mezbûrân Mustafa ve Muharrem nâm kimesnelerin her biri bizim her birimizi işhâd etti bizim dahi her birimiz mezbûrân Mustafa ve Muharrem’in her birinin lisânından husûs-ı mezbûre şâhidleriz şehâdet dahi ederiz deyû edâ-i şehâdet-i şer‘iyye ettiklerinde şehâdetleri ba‘de ri‘âyeti şerâiti’ş-şehâde ale’ş-şehâde hayyiz-i kabûlde vâkı‘a olmağın mûcebiyle meblağ-ı bâkī bin üç yüz seksen akçeyi mezbûr Hasan’a edâ ve teslîme mezbûr Mehmed’e tenbîh birle mâ vaka‘a bi’t-taleb ketb olundu. Fi’l-yevmi’s-sâbi‘ aşer min şehri Recebi’l-mürecceb li sene tis‘în ve elf. Şuhûdü’l-hâl: Musa Bey Subaşı, Mehmed Bey b. Ali, Hüseyin b. Ali, Mehmed b. Eyüb, Mehmed b. Mahmud.