Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 118 Hüküm no: 71 Orijinal metin no: [13a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Ağa b. Ahmed’in su yolu izni Su hüccetidir. İbrahim Ağa suyu Mahmiye-i İstanbul’da Hoca Hamza mahallesi sâkinlerinden olup sâbıkan ser-mi‘mârân-ı hâssa olan işbu râfi‘ü’l-kitâb iftihârü’l-emâcid ve’l-ekârim câmi‘ü’l-mehâmid ve’l-mekârim İbrahim Ağa b. Ahmed’in sulbî kebîr oğlu ve tarafından husûs-ı âti’l-beyâna vekîl olup hasm-ı câhid mahzarında Mustafa Ağa b. Mahmud ve Ahmed Bey b. Mustafa şehâdetleriyle şer‘an vekâleti sâbite olan fahrü’l-eşbâh Mehmed Ağa meclis-i şer‘-i şerîf-i enverde bi’l-vekâle takrîr-i kelâm ve ta‘bîr ani’l-merâm edip müvekkilem vâlidim mûmâ-ileyh İbrahim Ağa bundan akdem Havâss-ı Aliyye kazâsına tâbi‘ Kömürcü Belgrad nâm karye kurbunda Ayazma ve Yolcu Çayırı demekle ma‘rûf ve mevzi‘de kendi malıyla on yedi aded bacalar ve taht-ı arzdan lağımlar ve kanavât ile cem‘ ve tahsîl eylediği mâ’ın üzerine varılıp ba‘de’l-keşf ve’l-mu‘âyene erbâbı beyninde mu‘tâd-ı kadîm üzre vezn ve ayâr ve tahmîn-i sahîh ile tahmîn olunmak müvekkilim mûmâ-ileyhin murâdıdır dedikde cânib-i şer‘-i hatîrden mevlânâ Mehmed Efendi b. Nasuh irsâl olunup ol dahi hâssa su nâzırı mefharü’l-emâsil ve’l-akrân Mehmed Ağa b. Abdülmennân tarafından husûs-ı âti’l-beyâna vekîl-i sâbitü’l-vekâlesi ve hâssa su yolcuları kethüdâsı olan el-Hâc Mustafa b. Hasan ve bölükbaşılarından Hasan Çelebi b. Mahmud ve İsmail Çelebi b. İbrahim ve Mehmed b. Abdullah ve sâir zeyl-i vesîkada mektûbetü’l-esâmî cemâ‘at-i müslimîn ile mevzi‘-i mezkûrda zikr olunan mâ’ın üzerine varıp keşf ve mu‘âyene ve vech-i mu‘tâd üzre vezn ve ayâr ve tahmîn-i sahîh ile tahmîn olundukda kâmil iki buçuk masura su mevcûd ve cereyân ettiğini mu‘âyene ve mesâha eylediklerinden sonra sâlifü’z-zikr suyu mevzi‘-i mezkûre karîb merhûm ve mağfûrun-leh Sultan Süleyman Hân hazretleri suyu yoluna bi izni’l-mütevellî ilhâk ve idrâc ve buçuk masurası hakk-ı mecrâ alıkonulup bâkī iki masura su kalmağla zikr olunan iki masura suyu müvekkil-i mûmâ-ileyh İbrahim Ağa dediği mahalden ifrâz ve murâd eylediği mahalde icrâ etmek üzre icmâ‘ ve ittifâk ettiklerini mevlânâ-yı mezbûr mahallinde ketb ve tahrîr ba‘dehû ma‘an irsâl olunan Mehmed b. Eyüb ile meclis-i şer‘a gelip alâ vukū‘ihi inhâ ve takrîr etmeğin mâ hüve’l-vâki‘ gıbbe’l-ibtigā kayd şüd. Fi’l-yevmi’s-sânî ve’l-ışrîn min şehri Recebi’l-mürecceb li sene tis‘în ve elf. Şuhûdü’l-hâl: Mehmed Efendi b. eş-Şeyh Osman Efendi, İsmail Efendi b. Mehmed el-İmâm, Hasan Efendi b. Gazanfer el-İmâm, el-Hâc Abdurrahman b. Receb el-İmâm, es-Seyyid Mehmed Efendi b. eş-Şeyh Hasan Efendi, Hasan Efendi b. Ali Şeyhzâde, Ahmed Efendi b. Abdurrahman el-Müezzin, Mehmed Halîfe b. Hasan el-Müezzin, Ali Halîfe b. Yusuf, el-Hâc Mehmed Ağa b. Ali, İsmail Bey b. Resul, Ali Dede b. Ahmed, Mustafa Beşe b. Ahmed, Mustafa Ağa b. Mehmed, Osman Beşe b. Ali, Mustafa b. Mehmed Râh-âbî, Mehmed b. Ahmed, Mehmed b. İbrahim, Osman Çelebi b. eş-Şeyh Mehmed, Ömer Beşe b. Ebûbekir, Kenan b. Abdullah, Cafer b. Yusuf, Mehmed b. Eyüb.