Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 119 Hüküm no: 72 Orijinal metin no: [13b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sinan b. Abdülmennân’ın iki masura suyunu İbrahim Ağa b. Ahmed’e satması Su hüccetidir. Sinan Ağa [b.] İbrahim Ağa’nın Mustafa Paşa-yı Atîk mahallesinde çeşmeye. Husûs-ı âti’l-beyânın mahallinde ketb ve tahrîri iltimâs olunmağın savb-ı şer‘-i münîrden mevlânâ Mehmed Efendi b. Nasuh irsâl olunup ol dahi zeyl-i rakīmde mektûbetü’l-esâmî müslimîn ile Havâss-ı Aliyye kazâsına tâbi‘ Kömürcü Belgrad nâm karye kurbunda Ayazma ve Yolcu Çayırı demekle ma‘rûf mevzi‘e varıp akd-i meclis-i şer‘-i mübîn eyledikde sâbıkan ser-mi‘mârân-ı hâssa olan mefharü’l-emâsil ve’l-ekârim İbrahim Ağa b. Ahmed’in sulbî kebîr oğlu ve tarafından husûs-ı âti’l-beyânı ikrâra vekîl-i hasm-ı câhid mahzarında Mustafa Ağa b. Mahmud ve Ahmed Bey b. Mustafa şehâdetleriyle şer‘an vekâleti sâbite olan fahrü’l-eşbâh Mehmed Ağa meclis-i ma‘kūd-ı mezkûrda mahmiye-i İstanbul hısnı ebvâbından Hazret-i Ebâ Eyyûb-i Ensârî -radiye anhu Rabbühü’l-Bârî- kapısı dâhilinde Hoca Ali mahallesi sükkânından işbu râfi‘ü’l-kitâb zahrü’l-akrân el-Hâc Sinan b. Abdülmennân nâm kimesne mahzarında bi’l-vekâle ikrâr-ı tâm ve takrîr-i kelâm edip vâlidim müvekkilim mûmâ-ileyh İbrahim Ağa işbu mevzi‘-i mezbûrda yenbû‘ edip on yedi aded bacalar ki yetmiş sekiz kulaç hâlî lağım ve yetmiş yedi kulaç ma‘mûr lağım ve seksen kulaç kesme lağımlar ile merhûm ve mağfûrun-leh Sultan Süleyman Hân hazretleri suyuna gelince taht-ı arzdan kanavât ile cereyân edip mecrâ ve kanâtına tebe‘iyyet ile müvekkilim mûmâ-ileyh İbrahim Ağa’nın mülkü olan iki buçuk masura suyu kanavât [ve] mecrâsıyla ma‘an müvekkilim mûmâ-ileyh İbrahim Ağa mezbûr el-Hâc Sinan’dan bin üç yüz yetmiş beş esedî guruşa bey‘-i kat‘î bey‘ ve temlîk mezbûr el-Hâc Sinan dahi hâlâ sâkin olduğu mezkûr Hoca Ali mahallesi ile sâlifü’z-zikr Hazret-i Ebâ Eyyûb-i Ensârî kapısı dâhilinde Mustafa Paşa-yı Atîk mahallesinde hasbeten lillâhi te‘âlâ müceddeden binâ eylediğim çeşmelerde icrâ için sâlifü’l-beyân mülkü iki buçuk masura suyu kanavât ve mecrâsıyla ma‘an ber vech-i muharrer iştirâ ve temellük ve kabûl eyledikden sonra semeni olan meblağ-ı mezkûr bin üç yüz yetmiş beş esedî guruşu mezbûr el-Hâc Sinan yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân iki buçuk masura su mecrâ ve kanâtına tebe‘iyyet ile mezbûr el-Hâc Sinan’ın mülk-i müşterâsı olmuştur keyfe mâ yeşâ’ ve yahtâr mutasarrıf olsun dedi dedikde vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Mehmed b. Eyüb ile meclis-i şer‘a gelip alâ vukū‘ihi inhâ ve takrîr etmeğin mâ hüve’l-vâki‘ bi’l-ibtigā ketb olundu. Fi’l-yevmi’s-sânî ve’l-ışrîn min şehri Recebi’l-ferd li sene tis‘în ve elf. Şuhûdü’l-hâl: Es-Sâbikūn.