Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 120 Hüküm no: 73 Orijinal metin no: [13b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veli Ağa b. Mustafa’dan vârislere kalan çiftlik muhasebesi Havâss-ı Aliyye kazâsına tâbi‘ Ayastefanos nâm karyede mülk çiftliği olup mahmiye-i İstanbul’da Bucak bağı mahallesinde sâkin iken bundan akdem vefât eden Veli Ağa b. Mustafa nâm müteveffânın verâseti zevce-i metrûkesi Hatice bt. Mehmed nâm hâtun ile sulbî sagīr oğlu Abdullah’a münhasıra olduğu lede’ş-şer‘i’l-mutahhar zâhir ve mütehakkik oldukdan sonra sagīr-i mezbûrun vâlidesi merkūme Hatice tarafından çiftlik-i mezbûrun muhâsebesini görmeğe vekîl-i sâbitü’l-vekâlesi olan Ahmed Çelebi b. el-Hâc Mehmed ile sagīr-i mezbûrun vasiyy-i mansûbu olan li ebeveyn ammisi Şaban nâm kimesnenin üzerine kıbel-i şer‘den mansûb nâzırı ve mahalle-i mezbûrenin imâmı Mustafa Efendi b. Ömer talebiyle vasiyy-i mezbûrun zabtında olan çiftliğin üzerine varılıp vasiyy-i mezbûrun muhâsebesi görülmek bâbında fermân-ı şerîf sâdır olmağın imtisâlen-leh cânib-i şer‘den mevlânâ Mehmed Efendi b. Nasuh irsâl olunup ol dahi huzûr-ı müslimînde vasiyy-i mezbûrun makbûzu ve masrûfunun muhâsebesini görüp ketb ve tahrîr eylediğin defterdir ki zikr olunur. Hurrire fi’l-yevmi’r-râbi‘ ve’l-ışrîn min şehri Recebi’l-mürecceb li sene tis‘în ve elf. Hınta keyl aded 130 Şa‘îr keyl aded 160 Alef keyl aded 83 Fig keyl aded 30 Nohud keyl aded 5 Kaplıca Keyl aded 30 Burçak keyl aded 25 Saman-ı hınta Araba aded 45 Zikr olunan mahsûl târih-i mezkûr bin doksan senesinde hâsıl olup ve sene-i merkūmede vasiyy-i mezbûrun masrûfu dahi vech-i âtî üzre zikr olunur. Hınta orakçısına akçe aded 3000 Burçak için akçe aded 240 Nohud için akçe aded 120 Mahsûl-i fig için ücret akçe aded 240 Orakçılık revgan-ı zeyt ve lahm akçesi aded 120 Otu akçesi aded 446 Döğen akçesi aded 100 Revgan-ı sâde fiyat 35 kıyye 4 kıymet 140 Şem‘-i revgan kıymet 120 Ücret-i hizmetkâr aded 840 Def‘a ücret-i hizmetkâr akçesi aded 200 Def‘a ücret-i hizmetkâr aded 1080 Ücret-i meremmât-ı bi’r-i dolab aded 500 Meremmât-ı duvar-ı çiftlik-i mezkûr aded 900 Öküz na‘lına aded 100 Pirinç fî 67 keyl 4 aded 268 Kuyu kovası aded 16 kıymet 132 Urgan kuyuya aded 240 Dakīk kıymet 381 Nafaka-i ırgad ve ücret-i tarla için hınta Fî 80 37 aded 2160 Cem‘an yekûn 14756 Yalnız on dört bin yedi yüz elli altı akçedir. Şuhûdü’l-hâl: Ebûbekir Ağa b. Sefer, Ali Bey b. Abdullah, Hüseyin Bey b. Mehmed, Yahya Çelebi b. Hüseyin, Mehmed Bey b. İvaz, Hüseyin Çelebi b. Osman, Mustafa b. Mehmed, Halil Çelebi b. İbrahim, Hüseyin Çelebi b. Ömer, Ahmed Beşe b. İbrahim, Derviş Mehmed b. Mustafa, Çukadâr Ahmed Beşe ve gayruhüm.