Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 122 Hüküm no: 74 Orijinal metin no: [14a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süvari mukabelecisi Ali Efendi’nin tasarrufundaki vakıf menzilin bina ve arsasının ölçülmesi Mahmiye-i İstanbul’da Ayasofya kurbunda bi’l-fi‘l Atlı mukābelecisi olup işbu kitâb-ı sıhhat-nisâbın sâhibi olan umdetü erbâbi’t-tahrîr ve’l-kalem, zübdetü ashâbi’t-tastîr ve’r-rakam Ali Efendi b. Mustafa’nın tarafından husûs-ı âti’z-zikre vekîl olup Abdi Efendi b. Mustafa ve Ahmed Efendi b. Mehmed şehâdetleriyle şer‘an vekâleti sâbite olan umdetü’l-akrân Mustafa Çelebi b. Mahmud nâm kimesne meclis-i şer‘-i hatîr-i lâzımü’t-tevkīre gelip bi’l-vekâle takrîr-i kelâm ve ta‘bîr ani’l-merâm edip medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de vâki‘ merhûm Mehmed Bey mescid-i şerîfi evkāfından hâlâ müvekkilim mûmâ-ileyh Ali Efendi’nin taht-ı tasarrufunda olup bir tarafdan yine müşârün-ileyh Ali Efendi bahçesi ve bir tarafdan tarîk-i âm ile mahdûd her mâh vakf-ı mezbûra on beş akçe icâre-i müeccele verir bir sagīr tahtânî oda ve bir müşterek ayazma ta‘bîr olunur bi’r-i mâyı müştemil vakıf menzilin üzerine varılıp vakf-ı mezbûr mütevellîsi ma‘rifetiyle menzil-i mezkûrun nakzını keşf ve arsası mesâha olunması matlûbumdur dedikde savb-ı şer‘-i münîrden mevlânâ Abdüsselâm Efendi b. Nasuh irsâl olunup ol dahi hâssa mi‘mârlarından Ali Halîfe b. Abdullah ve sâir zeyl-i vesîkada muharrerü’l-esâmî sukūf ve ebniye ahvâline vukūfu olan müslimîn ile menzil-i mezbûre varıp müslimîn-i mezkûrîn huzûrunda akd-i meclis-i şer‘-i mübîn eyledikde meclis-i ma‘kūd-ı mezbûrda mi‘mâr-ı mezbûr ve vakf-ı mezbûrun mütevellîsi olan Mehmed Sıdkı Çelebi b. Mehmed tarafından husûs-ı mezbûra vekîl-i şer‘îsi olan Mustafa Çelebi b. Abdurrahman muvâcehesinde menzil-i mezkûrun binâ ma‘a zemîni mesâha eyledikde tûlen on bir zirâ‘ bir parmak ve arzen altı zirâ‘ on sekiz parmak bi hesâb-ı terbî‘î yetmiş iki zirâ‘ arsa ma‘a binâ olup arsa-i mezbûre üzerinde mebnî yalnız odayı mi‘mâr-ı mezbûr mesâha eyledikde tûlen altı zirâ‘ ve arzen altı zirâ‘ bi hesâb-ı mezbûr otuz altı zirâ‘ binâsı olup ve binâ-i mezbûrun her bir zirâ‘ı kırkar akçeden bin dört yüz kırk akçe vakf-ı mezbûrun nukzu olduğuna icmâ‘ ve ittifâk eylediklerini mevlânâ-yı mezbûr mahallinde tahrîr ba‘dehû ma‘an irsâl olunan Çukadâr Ahmed Beşe b. Hüseyin ve Muhzır Ali b. İslâm ile meclis-i şer‘a gelip her biri alâ vukū‘ihi inhâ ve takrîr etmeğin mâ vaka‘a bi’l-ibtigā ketb olundu. Fi’l-yevmi’s-sânî ve’l-ışrîn min şehri Recebi’l-mürecceb li sene tis‘în ve elf. Şuhûdü’l-hâl: Mehmed Efendi b. İbrahim, Ali Çelebi b. Ramazan, Süleyman Bey el-Cündî, Abdullah Bey el-Cündî, Hüseyin Bey el-Cündî, Mehmed Efendi b. Hüseyin, Mehmed Efendi b. Abdülkerim, Hasan Dede b. Ömer, Mustafa Ağa b. Hüseyin, el-Hâc Mustafa b. Receb, Halil Beşe b. Musa Haffâf, İsmail b. Süleyman Doğramacı, Arslan Bey b. Rıdvan, Receb b. Mustafa.