Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 123 Hüküm no: 75 Orijinal metin no: [14a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Abdullah’tan kalan evin karısı Kâtibe bt. Abdullah’a ait olduğu Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Takyecibaşı mahallesi sâkinelerinden işbu râfi‘atü’l-kitâb Kâtibe bt. Abdullah nâm hâtun meclis-i şer‘-i şerîfde takrîr-i kelâm ve ta‘bîr ani’l-merâm edip mahalle-i mezbûrede vâki‘ bir tarafdan Ebûbekir Beşe b. Ali mülkü ve bir tarafdan el-Hâc Musa b. İbrahim mülkü ve bir tarafdan tarîk-i hâs ve bir tarafdan tarîk-i âm ile mahdûd bir fevkānî ve bir tahtânî odaları ve bi’r-i mâyı ve bahçeyi ve kenîfi müştemil menzil bundan akdem vefât eden zevcim Hasan Beşe b. Abdullah’ın mülkü olup ba‘de vefâtihî bana ve müteveffâ-yı mezbûrun firâşından hâsıl sadrî sagīr oğlum Ali ve sadriye kızım Âişe’ye intikāl edip ba‘dehû sagīrân-ı mezbûrân dahi müte‘âkiben vefât etmekle menzil-i mezkûr bi’l-cümle irs-i şer‘le hasren bana isâbet ve intikāl etmişdir vâki‘ü’l-hâlî mahalle-i mezkûrdan hâzırûn bi’l-meclis Receb Efendi b. Yusuf el-İmâm ve Mehmed Çelebi b. Abdülaziz el-Müezzin ve Hüseyin Ağa b. Hasan ve Mehmed Bey b. Abdullah ve Ahmed Çelebi b. Ali ve Veli Bey b. Mehmed nâm kimesnelerden sırren istihbâr olunup haberleri tahrîr olunmak matlûbumdur dedikde gıbbe’s-suâl mezbûrûn Receb Efendi ve Mehmed Çelebi ve Hüseyin Ağa ve Mehmed Bey ve Mehmed Çelebi ve Veli Bey cevâblarında fi’l-vâki‘ menzil-i mahdûd-ı mezkûr müteveffâ-yı evvel Hasan’ın mülkü olup ba‘de vefâtihî vech-i muharrer veresesi Kâtibe ile sagīrân-ı mezbûrâna isâbet ve intikāl edip ba‘dehû sagīrân-ı mezbûrân dahi müte‘âkiben fevt olmağla menzil-i mezkûr bi’l-cümle hasren vâlideleri merkūme Kâtibe’ye isâbet ve intikāl, hâlâ menzil-i mezkûr bi’l-cümle mezbûre Kâtibe’nin mülk-i mevrûsudur deyû her biri alâ tarîki’ş-şehâde haber vermeğin mâ vaka‘a gıbbe’l-ibtigā ketb olundu. Fi’l-yevmi’l-hâmis ve’l-ışrîn min şehri Recebi’l-mürecceb li sene tis‘în ve elf. Şuhûdü’l-hâl: Hüseyin Bey b. Ali, İbrahim b. Mehmed, Yusuf b. Abdullah, Mehmed b. Eyüb, Hasan b. Abdullah ve gayruhüm.