Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 123 Hüküm no: 76 Orijinal metin no: [14a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musahib Mustafa Paşa’nın haslarına mütesellim olan Ahmed Ağa’nın alacaklılarıyla anlaşması Düstûr-ı ekrem müşîr-i efham vezîr-i sânî, müsâhib-i şehriyârî Mustafa Paşa hazretlerinin hâslarından olup vilâyet-i Anadolu’da Manisa kasabası mahallâtından Aşağı mahallesi ahâlîsinden Avik v. Yagob ve Avanos v. Murat nâm Ermeniler meclis-i şer‘-i şerîfde târih-i kitâbdan bir sene mukaddem hâss-ı mezbûra mütesellim olan fahrü’l-akrân Ahmed Ağa b. Mustafa tarafından ikrâr-ı âti’l-beyânı tasdîke vekîl olup hasm-ı câhid mahzarında vekâleti Hüseyin Bey b. Mehmed ve Süleyman Bey b. Mehmed şehâdetleriyle şer‘an sâbite olan Mehmed Çavuş b. Abdullah mahzarında her biri ikrâr ve i‘tirâf edip evvelâ mezbûr Avik târih-i mezbûrda müvekkil-i mezbûr Ahmed Ağa bi gayri hakkın cerîme nâmına benim yedimden doksan esedî guruş ahz ve mezbûr Avanos dahi kezâlik benden bi gayri hakkın cerîme nâmına kırk zirâ‘ çuka ile yirmi esedî guruşumu ahz ve kabz etmişidi el-hâletü hâzihî her birimiz meblağ-ı mezbûru merkūm Ahmed Ağa’dan da‘vâ ve taleb etmekle beynimizde münâza‘ât-ı kesîre ve muhâsamât-ı ekîde vâkı‘a olmağın beynimizde müslimûn-ı muslihûn tavassut edip mûmâ-ileyh Ahmed Ağa ile evvelâ mezbûr Avik ile beş esedî guruş sâniyen mezbûr Avanos dahi üç esedî guruş üzerlerine inşâ-i akd-i sulh eylelediklerinde bizim dahi her birimiz sulh-ı mezbûru kabûl ve bedel-i sulh olan mebleğayn-ı mezbûreynin ziyâdesine müte‘allika da‘vâdan her birimiz müvekkil-i mûmâ-ileyh Ahmed Ağa’nın zimmetini ibrâ-i âm ile ibrâ ve iskāt eyledik dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Recebi’l-mürecceb li sene tis‘în ve elf. Şuhûdü’l-hâl: Receb Efendi b. Yusuf, Hüseyin Ağa b. Hasan, Ahmed Bey b. Abdullah, Şahbaz b. Abdullah ve gayruhüm.