Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 124 Hüküm no: 77 Orijinal metin no: [14a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Anastaş’ın Sopotos köyündeki evini Anastaş, Nikola ve Todori’ye müştereken satması Vilâyet-i Rumeli’nde Kalavrita kazâsına tâbi‘ Sopotos nâm karye ahâlîsinden Yani v. Anastaş nâm zimmî meclis-i şer‘-i şerîfde sulbî oğlunun oğulları olup kendi tarafından asâleten ve li ebeveyn karındaşları Anastaş ve Nikola v. Panayot taraflarından ikrâr-ı âti’z-zikri tasdîke vekîl olup nehc-i şer‘î üzre vekâleti sâbite olan bâ‘is-i hâze’r-rakīm Todori v. Panayot nâm zimmî muvâcehesinde ikrâr ve i‘tirâf edip silk-i mülk-i sahîhimde münselik emlâkden karye-i mezbûrede vâki‘ bir tarafdan İstati v. Panayot zimmî mülkü ve bir tarafdan Vaslak v. İspilyot zimmî [14b] mülkü ve bir tarafdan Kanilo v. Todori zimmî mülkü ve bir tarafı tarîk-i âm ile mahdûd bir bâb tahtânî odayı ve bir mikdâr avluyu ve bir kıt‘a bahçeyi müştemil mülk menzilimi cemî‘ tevâbi‘ ve levâhıkı ile ve menzil-i mezkûr içinde mevcûd beynimizde ma‘lûm esâs-ı beyt ki evânî-i nühâsiyye ve gayr-ı nühâsiyyemi ve mevâzi‘-i müteferrikada vâki‘ altı dib dut ağacını ve tahmînen üç çapalık iki kıt‘a bağımı bi safkatin vâhidetin mezbûrûn Anastaş ve Nikola ve Todori’ye ale’l-iştirâki’s-seviy yirmi esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk edip anlar dahi ale’l-iştirâki’s-seviy iştirâ ve kabûl ve temellük eylediklerinden sonra hâlâ taht-ı tasarrufumda olup karye-i mezbûrede vâki‘ her birinin hudûdu beynimizde ma‘lûm üç kıt‘a tarlayı ve kazâ-i mezbûre tâbi‘ Çarıklı nâm karyede vâki‘ kezâlik hudûdu beynimizde ma‘lûm bir kıt‘a tarla dahi ki cem‘an dört kıt‘a tarlalarımın hakk-ı tasarruflarını dahi sâhib-i arz ma‘rifetiyle mezbûrûn Anastaş ve Nikola ve Todori’ye ale’l-iştirâki’s-seviy on esedî guruş bedel mukābelesinde tefvîz bi’l-ferâğ edip anlar dahi minvâl-i muharrer üzre tefevvuz ve kabûl eylediklerinden sonra semen-i mezbûr ile bedel-i merkūm cem‘an otuz esedî guruşu mesfûrûn Anastaş ve Nikola ve Todori yedlerinden bi’t-tamâm ahz ve kabz eyledim ba‘de’l-yevm emlâk-i mezbûre mesfûrûn Anastaş ve Nikola ve Todori’nin mülk-i müşterâları olmuşdur min ba‘d benim alâka ve medhalim yokdur, emlâk-i mezbûreyi ve arâzi-i merkūmeyi mahallinde zabt ve tasarrufa tarafımdan mesfûrûn Anastaş ve Nikola ve Todori[’yi] taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn men şehri Recebi’l-mürecceb li sene tis‘în ve elf. Şuhûdü’l-hâl: Hüseyin b. Ali, Mehmed b. Eyüb, Mehmed b. Mahmud, Ali b. Abdullah ve gayruhüm.