Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 125 Hüküm no: 78 Orijinal metin no: [14b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Kadın b. Hasan Efendi’nin yerini Mümine bt. İbrahim’e satması Mahmiye-i İstanbul’da Cezerî Kasım Paşa mahallesinde sâkine fahrü’l-muhadderât Âişe Kadın bt. el-müvellâ el-merhûm Hasan Efendi tarafından ikrâr-ı âti’l-beyâna vekîl olup mezbûrenin zâtını ma‘rifet-i şer‘iyye ile ârifân olan Hüseyin Çelebi b. Hasan ve Yusuf Kethüdâ b. Abdullah şehâdetleriyle şer‘an sâbite olan Mahmud Efendi b. Ahmed meclis-i şer‘de işbu bâ‘isetü’l-kitâb Mümine Hâtun bt. İbrahim mahzarında bi’l-vekâle ikrâr ve i‘tirâf edip müvekkile-i mûmâ-ileyhâ Âişe Kadın silk-i mülk-i sahîhinde münselik olup Havâss-ı Aliyye kazâsına tâbi‘ Müderris nâm karyede vâki‘ bir tarafı Minkārîzâde Abdullah Efendi hazretleri mülkü ve bir tarafı mezbûre Mümine Hâtun’un âhar mülkü ve iki tarafı tarîk-i âm ile ile mahdûd ve tahmînen bir dönüm mülk yurt yerimi mezbûre Mümine Hâtun’a on iki esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk ol dahi minvâl-i muharrer üzre iştirâ ve temellük ve kabûl eyledikden sonra semeni olan meblağ-ı mezbûr on iki esedî guruşu yedinden bi’t-tamâm ahz ve kabz eyledim ba‘de’l-yevm zikr olunan yurt yerinde alâka ve medhalim yokdur mezbûre Mümine Hâtun’un mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min şehri Recebi’l-mürecceb li sene tis‘în ve elf. Şuhûdü’l-hâl: Mehmed Çelebi b. Veli, Mehmed b. Eyüb, Mehmed b. Mahmud, Hüseyin b. Ali ve gayruhüm.