Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 127 Hüküm no: 80 Orijinal metin no: [15a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman b. Mehmed’in bahçesini annesi İsmihan bt. Mustafa’ya satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Nişancı mahallesi ahâlîsinden Osman b. Mehmed nâm kimesne meclis-i şer‘-i hatîrde vâlidesi işbu râfi‘atü’l-kitâb İsmihân bt. Mustafa nâm hâtun mahzarında tâyi‘an ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk ve zabt-ı tasarrufumda olup mahalle-i mezbûrede vâki‘ bir tarafdan İbrahim b. Abdullah mülkü ve bir tarafdan ba‘zan Ahmed b. Hasan ve ba‘zan Mehmed b. Mustafa nâm kimesneler mülkleri ve bir tarafdan Hasan Ağa b. Mehmed mülkü ve bir tarafdan Ali b. Mehmed mülkü ile mahdûd bi’r-i mâyı ve zât eşcâr-ı müsmire ve gayr-ı müsmireyi hâvî bahçemi, cemî‘ tevâbi‘ ve levâhıkı ve âmme-i menâfi‘ ve merâfıkı ile vâlidem mezbûre İsmihân Hâtun’a kırk kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr kırk guruşu vâlidem merkūme İsmihân Hâtun yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan bahçe vâlidem merkūme İsmihân Hâtun’un mülk-i müşterâsı olmuşdur keyfe mâ yeşâ’ ve haysü mâ yahtâr mutasarrıfe olsun dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā kayd olundu. Fi’l-yevmi’s-sâbi‘ ve’l-ışrîn min şehri Recebi’l-mürecceb li sene tis‘în ve elf. Şuhûdü’l-hâl: Mustafa Çelebi b. Cafer, fahrü’l-müsta‘iddîn Abdüsselâm Efendi b. el-merhûm Nasuh Efendi, Ramazan Çelebi b. Mustafa, Mehmed b. Hüseyin, Mehmed b. Abdullah, Hasan b. Hüseyin, Osman b. Mustafa, İbrahim b. Mustafa, es-Seyyid Ârif Çelebi b. Mustafa, Mehmed b. Eyüb, Hasan Beşe b. Abdullah, Ali b. Abdullah ve gayruhüm.