Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 128 Hüküm no: 81 Orijinal metin no: [15a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Abdullah’ın vekilinin Havva bt. Mehmed’de olan miras alacağını tahsil ettiği Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Bıçakçı Ferhad mahallesinde sâkin iken bundan akdem vefât eden Mustafa b. Mehmed nâm müteveffânın verâseti zevce-i metrûkesi Belkıs bt. Abdullah ve zî-rahm cihetinden Havva bt. Mehmed nâm hâtunlara münhasıra olduğu şer‘an zâhir ve mütehakkik oldukdan sonra merkūme Belkıs’ın tarafından husûs-ı âti’l-beyânı da‘vâ ve taleb ve ahz ve kabza ve kendiye îsâl ve kabz ve îsâl mütevakkıf olduğu esbâbın küllîsine hüccet-i şer‘iyye ile vekîl olan el-Hâc Ahmed b. Abdullah nâm kimesne meclis-i şer‘-i şerîfde müteveffâ-yı mezbûrun terekesine vâzı‘atü’l-yed olan işbu râfi‘atü’l-kitâb mezbûre Havva’nın zevci ve tarafından kezâlik husûs-ı âti’l-beyâna vekîl-i müsecceli olan Halil Efendi b. Haydar mahzarında bi’l-vekâle ikrâr-ı tâm ve takrîr-i kelâm edip müvekkilem mezbûre Belkıs zevci müteveffâ-yı mezbûrun mahalle-i mezbûrede vâki‘ mülk menzili semeni ile sâir kalîl ü kesîr ism-i mâl ıtlâk olunur terekesinden bin beş yüz akçe mehr-i müeccel-i müsbet hakkını ve rub‘ hisse-i şer‘iyyesine isâbet eden bin dört yüz elli üç akçe dahi ki cem‘an iki bin dokuz yüz elli üç akçe hakkını vekîl-i mezbûr Halil Efendi yedinden vekâlet-i mahkiyem hasebiyle bi’t-tamâm ve’l-kemâl ahz ve kabz eyledim min ba‘d müvekkilem merkūme Belkıs’ın müvekkile-i mezbûre Havva Hâtun zimmetinde ve yedinde ve vekîl-i mezbûr Halil Efendi zimmetinde ve yedinde bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ vaka‘a bi’l-ibtigā ketb olundu. Fi’l-yevmi’s-sâmin min şehri Recebi’l-mürecceb li sene tis‘în ve elf. Şuhûdü’l-hâl: Mehmed Efendi b. Süleyman, Yusuf Çelebi b. Mehmed Münâdî, Mehmed Çelebi b. Hüseyin el-Müezzin, Mustafa Halîfe b. Ahmed, Ahmed b. İbrahim ve gayruhüm.