Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 128 Hüküm no: 82 Orijinal metin no: [15a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Yusuf’un oturdukları evde sahip olduğu yarım hisseyi eşi Emine bt. Mehmed’e satması Havâss-ı Aliyye kazâsına tâbi‘ kasaba-i Hasköy’de Sütlüce mahallesinde sâkin Mehmed b. Yusuf nâm kimesne meclis-i şer‘-i şerîfde zevce-i menkûhası râfi‘atü’l-vesîka Emine bt. Mehmed nâm hâtun muvâcehesinde ikrâr ve i‘tirâf edip ale’l-iştirâki’s-seviy silk-i mülk-i sahîhimizde münselik olup mahalle-i mezbûrede vâki‘ bir tarafı hatîbe meşrûta vakıf menzil ve bir tarafı Kara oğlan demekle ma‘rûf Ahmed Kayıkçı’nın sâkin olduğu vakıf menzil ve bir tarafı Derviş Ağa b. Mehmed mülkü ve bir tarafı [tarî]k-i âm ile mahdûd tabaka-i ulyâsında bir bâb fevkānî oda ve bir sofa ve tabaka-i vustâsında bir bâb oda ve dehliz ve tabaka-i süflîsinde bir bâb tahtalı oda ve bir matbah ve câr-ı mülâsık olan Kör Ahmed ile müşterek bi’r-i mâ ve bir mikdâr bahçeyi müştemil mülk menzilde olan nısf hissemi, cemî‘ tevâbi‘ ve levâhıkı ile zevcem mezbûre Emine’ye altı bin fıddî râyic fi’l-vakt akçeye bey‘ ve temlîk edip ol dahi minvâl-i muharrer üzre iştirâ ve temellük ve kabûl eyledikden sonra semeni olan meblağ-ı mezbûrdan üç bin altı yüz akçesini merhûme Nevatâ Hâtun vakfına zimmetinde lâzımü’l-edâ deynimi edâ eyleye ve iki bin dört yüz akçesi dahi zevcem mezbûre Emine Hâtun’a cihet-i karz-ı şer‘îden olan bin üç yüz akçe deynime ve bin yüz akçesi dahi yine zevcem mezbûre Emine’nin zimmetinde mütekarrir ve ma‘kūd-ı aleyh bin yüz akçe mehr-i müeccel hakkına takās eyledi dediklerinde mezbûre Emine dahi semen-i merkūm altı bin akçeden üç bin altı yüz akçesini cânib-i vakf-ı mezbûreye edâya ta‘ahhüd edip ve iki bin dört yüz akçesini dahi zevc-i mezbûr Mehmed zimmetinde olan altı bin dört yüz akçe hakkına takās ve kabûl eyledikde mâ hüve’l-vâki‘ bi’l-ibtigā ketb olundu. Fi’l-yevmi’r-râbi‘ ve’l-ışrîn min şehri Recebi’l-mürecceb li sene tis‘în ve elf. Şuhûdü’l-hâl: Hüseyin b. Abdullah, Hasan b. Abdullah, Ali [b.] Abdullah, Ali b. Ahmed, Mehmed b. Eyüb, Mehmed b. Mahmud, Dilâver b. Abdullah ve gayruhüm.