Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 129 Hüküm no: 83 Orijinal metin no: [15a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi’nin evinin hissesini kardeşi Mehmed Çelebi’ye satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Câmi‘-i Kebîr mahallesi sâkinelerinden iken bundan akdem fevt olan Râbia bt. Mehmed Çelebi ve Ali Çelebi’ye münhasıra olduğu şer‘an zâhir ve müte‘ayyin oldukdan sonra mezbûr Ali Çelebi meclis-i şer‘-i hatîr-i lâzımü’t-tevkīrde li ebeveyn er karındaşı işbu râfi‘ü’l-kitâb mezbûr Mehmed Çelebi mahzarında tâyi‘an ikrâr-ı tâm ve takrîr-i kelâm edip vâlidemiz müteveffâ merkūme Râbia Hâtun’un muhallefâtından olup mahalle-i mezbûrede bir tarafdan dere ve bir tarafdan Kulu oğlu Mustafa nâm müteveffânın veresesi mülkü olan menzil ve bir tarafdan ba‘zan debbâğ Ahmed tasarrufunda olan vakf menzil ve ba‘zan el-Hâc Hüseyin vakfı olan menzil ve bir tarafdan tarîk-i âm ile mahdûd üç bâb fevkānî ve iki bâb tahtânî odaları ve bi’r-i mâyı ve ahırı ve kenîfi ve bahçeyi müştemil mülk menzilin nısfı bana ve nısf-ı âharı karındaşım mersûm Mehmed Çelebi’ye irsen intikāl etmeğin ben dahi menzil-i mahdûd-ı mezkûrda olan nısf hisse-i şâyi‘amı cemî‘ tevâbi‘iyle karındaşım mezbûr Mehmed Çelebi’ye yüz seksen kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr yüz seksen guruşu karındaşım mezbûr Mehmed Çelebi’nin yedinden bi’t-tamâm ve’l-kemâl ahz ve kabz eyledim min ba‘d mecmû‘-ı menzil-i mahdûd-ı mezkûr irsen ve şer‘an karındaşım mezbûr Mehmed Çelebi’nin mülk-i mahz ve hakk-ı sırfıdır keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’t-tâsi‘ ve’l-ışrîn min Recebi’l-mürecceb li sene tis‘în ve elf. Şuhûdü’l-hâl: Fahrü’l-eşbâh Mehmed Ağa Ser-mi‘mârân-ı hâssa, Ali Ağa b. Hüseyin, İbrahim Ağa b. Mustafa, Mehmed Ağa b. Şaban, Ali Ağa b. Abdullah, Hasan Bey b. Abdullah, Mehmed b. Mahmud.