Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 130 Hüküm no: 84 Orijinal metin no: [15a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hamza Beşe b. Murad’ın tarlasının tasarruf hakkını Ahmed b. Osman’a devretmesi Vilâyet-i Rumeli’nde İstarova kazâsına tâbi‘ Eterisko? nâm karye ahâlîsinden Hamza Beşe b. Murad nâm râcil meclis-i şer‘-i hatîr-i lâzımü’t-tevkīrde işbu râfi‘ü’l-vesîka Ahmed b. Osman nâm kimesne mahzarında ikrâr ve i‘tirâf edip tefvîz-i âtî sudûruna değin zabt ve tasarrufumda olup karye-i mezbûrede vâki‘ bir tarafı Hasan b. Ahmed tarlası ve bir tarafı Halil b. Ömer tarlası ve bir tarafı Mehmed b. Mustafa tarlası ve bir tarafı benim âhar tarlam ile mahdûd bir kıt‘a tarlamın hakk-ı tasarrufunu sâhib-i arz ma‘rifetiyle mezbûr Ahmed’e sekiz yüz akçe bedel mukābelesinde [15b] tefvîz bi’l-ferâğ edip ol dahi tefevvuz ve kabûl eyledikden sonra bedel-i merkūm sekiz yüz akçeyi mezbûr Ahmed yedinden bi’t-tamâm ahz ve kabz eyledim ba‘de’l-yevm zikr olunan tarlada alâka ve medhalim yokdur, müşterî-i mezbûrun hakk-ı tefevvuzu olmuşdur keyfe mâ yeşâ’ mahallinde zabt ve tasarrufa mezbûr Ahmed’i taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fî gurre-i Şa‘bâni’l-mu‘azzam li sene tis‘în ve elf. Şuhûdü’l-hâl: Hüseyin b. İsmail, Süleyman b. Mustafa, Ali b. Durmuş, Mehmed b. Mahmud, Hasan b. Abdullah.