Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 131 Hüküm no: 86 Orijinal metin no: [15b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihal v. Niko’nun hırsızlık kastıyla girdiği bostanın sahibi Mustafa b. Abdullah’ın burnunu kırması Havâss-ı Aliyye kazâsına tâbi‘ Müderris nâm karye ahâlîsinden işbu râfi‘ü’l-kitâb Mustafa b. Abdullah nâm kimesne mahfil-i kazâda löküncü tâifesinden Mihal v. Niko nâm zimmî muvâcehesinde üzerine da‘vâ ve takrîr-i kelâm edip târih-i kitâbdan bir gün mukaddem gece ile ba‘de’l-işâ karye-i merkūmede vâki‘ taht-ı icâretimde olan bostanda bostan beklerken, merkūm Mihal iki nefer refîki ile kavun karpuz serikası kasdıyla geldikde ben dahi men‘ ve def‘ murâd etmeğin merkūm Mihal bir kıt‘a taş ile burnum üzerine darb edip burnumun azmin kesriyle beni mecrûh etmişdir hâlâ eser-i cerhim keşf ve müşâhede olundukdan sonra merkūm Mihal’den suâl olunup takrîri tahrîr ve mûceb-i şer‘îsi icrâ olunmak murâdımdır dedikde fi’l-vâki‘ mezbûr Mustafa’nın eser-i cerhi müşâhede olunup mesfûr Mihal’e suâl olundukda inkâr ile cevâb vermeğin müdde‘î-i mezbûrdan müdde‘âsını mübeyyine beyyine taleb olundukda karye-i mezbûre sükkânından Abdullah b. Ali nâm kimesne ile karye-i mezbûreye karîb Küçükköy nâm karye sâkinlerinden Petro v. Dimo nâm zimmî makām-ı kazâya hâzırân olup istişhâd olunduklarında fi’l-vâki‘ târih-i kitâbdan bir gün mukaddem gece ile ba‘de’l-işâ mersûm Mihal mezbûr Mustafa’nın karye-i merkūmede vâki‘ bostanına vakt-i mezkûrede kavun karpuz serikası kasdıyla geldikde müdde‘î-i mezbûr Mustafa men‘ ve def‘ murâd eyledikde merkūm Mihal ber vech-i muharrer bir kıt‘a taş ile bizim huzûrumuzda müdde‘î-i mezbûr Mustafa’nın burnuna darb ile merkūm Mustafa’nın burnu azmini kesr ile mecrûh eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylelediklerinde ba‘de’t-ta‘dîl ve’t-tezkiyye şâhidân-ı mezbûrâna şehâdetlerinde kâzibân olmadıklarına yemîn dahi verildikden sonra şehâdetleri makbûle olmağın mûcebiyle ba‘de’l-hükm mâ vaka‘a kayd şüd. Fi’l-yevmi’r-râbi‘ min Şa‘bâni’l-mu‘azzam li sene tis‘în ve elf. Şuhûdü’l-hâl: Mehmed Beşe b. Şaban Odabaşı, Arslan Bey b. Abdullah, Mehmed Çelebi b. Halil, Hüseyin Bey b. Halil, Şâhin b. Abdullah, Mehmed Beşe b. Memi ve gayruhüm.