Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 132 Hüküm no: 87 Orijinal metin no: [15b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman b. Mehmed’in, haydutlarca öldürülen Ömer Beşe b. Ramazan’ın vârisi olduğu Sebeb-i tahrîr-i kitâb nakli ve mûcib-i tastîr-i hitâb hükmü oldur ki fi’l-asl vilâyet-i Anadolu’da Livâ-i Kastamonu’da Devrekâni kazâsına tâbi‘ Tepecikler nâm karyeden olup hâlâ mahmiye-i İstanbul’da Cebeali kurbunda Seferikoz mahallesinde sâkin olan işbu nâkilü’l-kitâb Osman b. Mehmed b. Oruc nâm kimesneden ale’l-vechi’l-âtî da‘vâ-yı sahîha-i şer‘iyye ile mesbûk istişhâd-ı şer‘î sudûrundan sonra udûl-i ricâlden fi’l-asl karye-i mezbûreden olup lâkin karye-i mezbûre ahâlîsi perâkende ve perîşân olmağla ahâlîsinin ekseri İstanbul’da ve etrâfında mutavattın olmağın hâlâ medîne-i Üsküdar’da Sultantepesi mahallesinde sâkin Mustafa b. Ahmed b. Maden ve mahmiye-i mezkûrede Hocapaşa kurbunda Karakedi mahallesinde sâkin gümrük hamallarından Osman b. Muharrem b. Maden ve yine mahmiye-i mezbûrede Haydarpaşa mahallesinde sâkin Ahmed b. Satılmış b. Şükrullah ve yine mahmiye-i merkūmede merhûm ve mağfûrun-leh Sultan Bayezid Han kurbunda Kuşbazlar nâm mahalde sâkin Ramazan b. Hızır b. Ebûbekir ve yine merhûm Sultan Süleyman Hân câmi‘-i şerîfi kurbunda Devoğlu? mahallesinde sâkin Hüseyin b. Fazlullah b. Himmet nâm kimesneler nakl ve tahvîl için mahall-i cerh ve ta‘dîle li ecli’ş-şehâde hâzırûn olup her biri şöyle edâ-i şehâdet-i şer‘iyye eylediler ki fi’l-asl karye-i mezbûre Tepecikler’den olup hâlâ vilâyet-i Rumeli’nde nefs-i Kasaba-i Silistire’de mütevattın olup yine vilâyet-i mezkûrede Konpolid Panayırı’ndan gelirken Bektaş nâm kasaba kurbunda vâki‘ ormanda haydut eşkiyâsı ta‘bîr olunur kuttâ‘-ı tarîk zulmen katl edip terekesi kasaba-i mezbûrede serdâr olan ( ) nâm kimesne yedinde mazbût idiğin istimâ‘ olunan Ömer Beşe b. Ramazan b. Hanefi nâm müteveffâ ile müsteşhid-i mezbûr Osman li ümm karındaşlar olup anaları ismi Mevcûd ve analarının babaları ismi Demirci el-Hâc Hasan ve maskat-ı re’sleri karye-i mezbûredir ve müteveffâ-yı mezbûrun verâseti zevce-i metrûkesi Âişe bt. ( ) nâm hâtun ile müsteşhid-i mezbûr Osman’a münhasıradır müteveffâ-yı mezbûrun mezbûrândan gayrı vârisi ve terekesine müstahıkk-ı âhar olduğu ma‘lûmumuz değildir müsteşhid-i mezbûr için tereke-i müteveffâ-yı mezbûra vaz‘-ı yed edenlerden hakk-ı taleb ve ahz vardır biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylelediklerinde ba‘de’t-ta‘dîl ve’t-tezkiyye şehâdetleri makbûle olmağın hakīkat-i hâl ve masdûka-i makāl gıbbe’t-taleb ve’s-suâl bi’l-fi‘l kasaba-i Silistire’de icrâ-yı ahkâm-ı şer‘iyye eden umdetü kuzâti’l-İslâm zübdetü vülâtü’l-enâm izzetlü efendi hazretlerinin meclis-i şerîflerine ve sâir usûl ve nüvvâbdan bu kitâb-ı müstetâbü’l-hâli ani’ş-şekk ve’l-irtiyâb vâsıl olan efendilerin mecâlis-i refî‘alarına inhâ olundu me’mûldür ki telakkī bi’l-kabûl ve amelen bi’l-medlûl buyurulup indallâhi’l-meliki’l-Cemîl nâil-i ecr-i cezîl olalar. Cerâ zâlik ve hurrire fi’l-yevmi’l-hâmis min Şa‘bâni’l-mu‘azzam li sene tis‘în ve elf. Şuhûdü’l-hâl: ( ).