Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 133 Hüküm no: 88 Orijinal metin no: [16a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Ahmed’in tütün satışından Abdullah b. Osman’da alacağı olduğu Medîne-i Hazret-i Ebâ Eyyûb-i Ensârî’de Kiremitçi Süleyman Çelebi mahallesinde sâkin râfi‘ü’l-kitâb Mustafa Beşe b. Ahmed meclis-i şer‘-i şerîfde Abdullah b. Osman mahzarında üzerine da‘vâ ve takrîr-i kelâm edip mezbûr Abdullah zimmetinde vakıyyesi beynimizde ilm-i şer‘î birle ma‘lûmumuz duhân yaprağı semeninden iki bin akçe hakkım olup meblağ-ı mezbûrun mukaddemâ mezbûr Abdullah yedinden altı yüz yetmiş üç akçesini ahz ve kabz edip bin üç yüz yirmi yedi akçe hakkım bâkī kalmışidi hâlâ taleb eylediğimde edâdan imtinâ‘ eder suâl olunup alıverilmesi murâdımdır dedikde gıbbe’s-suâl mezbûr Abdullah cevâbında fi’l-vâki‘ müdde‘î-i mezbûr Mustafa Beşe’ye vakıyyesi beynimizde ilm-i şer‘î birle ma‘lûm duhân yaprağı semeninden iki bin akçe deynim olup meblağ-ı mezbûrun mukaddemâ altı yüz yetmiş akçesini kendiye def‘ ve teslîm edip bâkī bin üç yüz yirmi yedi akçe zimmetimde müdde‘î-i mezbûr Mustafa Beşe’ye lâzımü’l-edâ ve vâcibü’l-kazâ deynim bâkī kalmışdır deyû bi tav‘ihî ikrâr ve i‘tirâf etmeğin alâ mûcebi i‘tirâfihî meblağ-ı bâkī bin üç yüz yirmi yedi akçeyi müdde‘î-i mezbûra edâ ve teslîme mezbûr Abdullah’a tenbîh birle mâ vaka‘a bi’t-taleb ketb olundu. Fî gurreti Şa‘bâni’l-mu‘azzam li sene tis‘în ve elf. Şuhûdü’l-hâl: Ahmed Çelebi b. ( ) Muhtesib, Mehmed b. Eyüb, Mehmed b. Mahmud, Ali b. Abdullah ve gayruhüm.