Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 133 Hüküm no: 89 Orijinal metin no: [16a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Mehmed’in arsasını kardeşi Ömer’e satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Nişancı Paşa mahallesinde sâkin Ali b. Mehmed nâm kimesne meclis-i şer‘-i şerîfde li ebeveyn er karındaşı işbu râfi‘ü’l-kitâb Ömer b. Mehmed nâm kimesne mahzarında tâyi‘an ikrâr-ı tâm ve takrîr-i kelâm edip akd-i âtî sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan yine benim âhar mülküm ve bir tarafdan Ahmed b. Hasan mülkü ve bir tarafdan Osman b. Mehmed mülkü ve bir tarafdan karındaşım mezbûr Ömer mülkü ile mahdûd tûlen ve arzen bi hesâb-ı terbî‘î otuz dokuz guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mastûr on dokuz guruşu karındaşım mezbûr Ömer yedinden tamâmen ahz ve kabz eyledim ba‘de’l-yevm arsa-i mezkûre mezbûr Ömer’in mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ vaka‘a bi’l-ibtigā ketb olundu. Fi’l-yevmi’r-râbi‘ min Şa‘bâni’l-mu‘azzam li sene tis‘în ve elf. Şuhûdü’l-hâl: Mustafa Çelebi b. Cafer, Hüseyin Halîfe b. Mehmed el-Müezzin, Ramazan Çelebi b. Mustafa, Ahmed Çelebi b. Mustafa, Bender b. Mehmed, Ali b. Mustafa, Mehmed b. Mustafa, Şaban b. Mustafa.