Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 134 Hüküm no: 90 Orijinal metin no: [16a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Osman’ın menzil davasının reddi Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Yenimahalle demekle ma‘rûf el-Hâc Hüsrev mahallesinde tevliyyet ve gallesi mahalle-i mezbûre imâmına meşrûta olup yine mahalle-i mezbûrede vâki‘ bir tarafdan Ahmed Beşe b. ( ) mülkü ve iki tarafdan mekābir-i müslimîn ve bir tarafdan tarîk-i âm ile mahdûd menzile hâlâ icâre-i müeccele ve mu‘accele ile mutasarrıfe olan işbu râfi‘atü’l-kitâb Emine [bt.] İsa nâm hâtun meclis-i şer‘-i şerîfde sadriye kebîre kızı Fâtıma bt. Osman nâm hâtun mahzarında takrîr-i kelâm ve ta‘bîr ani’l-merâm edip menzil-i mahdûd-ı mezbûr bundan akdem merkūm mezbûre Fâtıma’nın taht-ı tasarrufunda olup lâkin işbu bin doksan senesi şehr-i Rebî‘ulevveli’nde menzil-i mezkûru ma‘rifet-i mütevellî ile beynimizde nev‘i ve cinsi ve adedi ma‘lûm esvâb mukābelesinde bana tefvîz hattâ vech-i meşrûh üzre ferâğını müş‘ir mütevellî-i vakf-ı mezbûr yedime memhûr temessük dahi vermeğin ben dahi hâlâ zarûretimiz hasebiyle menzil-i mezkûru âhara izn-i mütevellî ile bir mikdâr akçe mukābelesinde ferâğ ve tefvîz murâd eylediğimde mezbûre Fâtıma ferâğıma mâni‘a olup hâlâ temessüke nazar olunup merkūme Fâtıma’dan ba‘de’l-istintâk takrîri tahrîr ve bî-vech mu‘ârazadan men‘ ve def‘ olunmak matlûbumdur deyû yedinde olan temessükü ibrâz ve merkūme Fâtıma muvâcehesinde feth ve kırâat olundukda mazmûnu mezbûre Emine’nin takrîr-i meşrûhuna muvâfık bulunup mezbûre Fâtıma’dan istintâk olundukda mezbûre Fâtıma dahi mazmûn-ı temessükü tav‘an ikrâr u i‘tirâf etmeğin alâ mûcebi i‘tirâfihâ menzil-i mezkûre bî-vech ta‘arruzdan mezbûre Fâtıma men‘ birle mâ vaka‘a kayd şüd. Fi’l-yevmi’s-sâdis min Şa‘bân li sene tis‘în ve elf. Şuhûdü’l-hâl: Mehmed Efendi b. Nasuh, es-Seyyid Ârif Çelebi b. Mustafa, Mehmed b. Mahmud, Hüseyin Çelebi b. Ali, Hasan b. Abdullah ve gayruhüm.