Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 135 Hüküm no: 91 Orijinal metin no: [16a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Mustafa’nın evini oğlu Osman b. Mustafa’ya satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Nişancı mahallesi sâkinelerinden Âişe bt. Mustafa nâm hâtun tarafından husûs-ı âti’l-beyânı ikrâra vekîl olup bimâ hüve tarîkü’s-sübût şer‘an vekâleti sâbite olan Mustafa Çelebi b. Cafer nâm kimesne meclis-i şer‘-i şerîfde müvekkile-i mezbûrenin sadrî kebîr oğlu işbu râfi‘ü’l-kitâb Osman b. Mustafa nâm kimesne tarafından ikrâr-ı âti’z-zikri tasdîke vekîl-i sâbitü’l-vekâlesi ve li ebeveyn er karındaşı olan Mehmed b. Mustafa nâm kimesne mahzarında bi’l-vekâle ikrâr ve takrîr-i kelâm edip müvekkilem merkūme Âişe Hâtun akd-i âti’z-zikrin sudûruna değin silk-i mülk-i sahîhinde münselik olup mahalle-i mezbûrede vâki‘ iki tarafdan müvekkil-i mezbûr Mehmed’in mülkü ve bir tarafdan İbrahim Beşe b. Osman mülkü ve bir tarafdan tarîk-i âm ile mahdûd bir bâb tahtânî odayı müştemil menzilini cemî‘ tevâbi‘i ile müvekkil-i mezbûr Mehmed’e bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mastûr bin akçeyi mersûm Mehmed yedinden tamâmen ahz ve kabz eyledim min ba‘d menzil-i mahdûd-ı mezkûr müvekkil-i merkūm Mehmed’in mülk-i müşterâsı olmuşdur keyfe mâ yeşâ’ mutasarrıf olsun dedi dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’s-sâbi‘ min Şa‘bâni’l-mu‘azzam sene [10]90. Şuhûdü’l-hâl: Mehmed Efendi b. ( ) el-İmâm, Hüseyin Halîfe b. ( ) el-Müezzin, Ramazan b. Mustafa, Mehmed b. Bender, Süleyman b. Abdullah, Hüseyin b. Abdullah, Muharrem b. Abdullah.