Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 135 Hüküm no: 92 Orijinal metin no: [16a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ermeni Ohtik v. Murat’ın bostan satışından Bogos v. Viranezan’da alacağı olması Medîne-i Hazret-i Ebâ Eyyûb-i Ensârî’de vâki‘ çömlekçi tâifesinden râfi‘-i hâze’r-rakīm Ohtik v. Murat nâm Ermeni meclis-i şer‘de Bogos v. Viranezan nâm Ermeni muvâcehesinde üzerine da‘vâ ve takrîr-i kelâm edip târih-i kitâbdan bir buçuk ay mukaddem medîne-i mezbûreye tâbi‘ Müderrisköyü demekle ma‘rûf nâm karye sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd kavun ve karpuz zer‘ olunmuş mülk bostanım içinde mezrû‘ kavun ve karpuzun zuhûru vaktinde mezrû‘-ı mezkûru mezbûr Bogos’a yetmiş esedî guruşa bey‘ ve teslîm edip ol dahi minvâl-i muharrer üzre iştirâ ve temellük eyleyip semeni olan meblağ-ı mezbûrdan on guruşunu dahi ahz ve kabz eylediğimden sonra mesfûr Bogos bostan-ı mezbûra vaz‘-ı yed edip hattâ bin akçe mikdârı kavun ve karpuz bey‘ etmişiken hâlâ mesfûr Bogos ben zarar eyledim deyû fesh-i akd-i bey‘-i mezkûra şer‘an kādir olmuş zu‘muyla zimmetinde bâkī kalan altmış esedî guruş hakkımı vermede te‘allül eder suâl olunup takrîri tahrîr ve meblağ-ı bâkī-i mezkûrun alıverilmesi matlûbumdur dedikde gıbbe’s-suâl mesfûr Bogos müdde‘î-i mezbûrun takrîr-i meşrûhu üzre bostan-ı mezkûru iştirâ ve kabz ve vaz‘-ı yed edip beş yüz akçelik kavun [16b] karpuz bey‘ ettiğini ikrâr ve i‘tirâf etmeğin alâ mûcebi ikrârihî bostan-ı mezkûru ke’l-evvel zabt ve tasarrufuna ve meblağ-ı bâkī altmış esedî guruşu müdde‘î-i mezbûr Ohtik’e edâ ve teslîme tenbîh birle mâ vaka‘a bi’t-taleb ketb olundu. Fi’l-yevmi’r-râbi‘ min Şa‘bâni’l-mu‘azzam li sene tis‘în ve elf. Şuhûdü’l-hâl: Hüseyin b. Ali, Mehmed b. Eyüb, Mehmed b. Mahmud, Hasan b. Ali ve gayruhüm.