Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 136 Hüküm no: 93 Orijinal metin no: [16b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Ramazan’ın arsasını Nâzikî Mehmed Ağa b. Hasan’a satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Davud Ağa mahallesinde sâkine Âişe bt. Ramazan nâm hâtun tarafından zikri âtî arsayı bey‘ ve teslîm ve kabz-ı semen ve kendiye îsâle vekîl olup mezkûrenin zâtını ma‘rifet-i şer‘iyye ile ârifân olan Mustafa Çelebi b. Şaban ve Hüseyin Çelebi b. Mehmed nâm kimesneler şehâdetleriyle şer‘an vekâleti sâbite olan zevci Hüseyin Bey b. el-Hâc Şaban nâm kimesne meclis-i şer‘-i şerîfde işbu sâhibü’l-kitâb fahrü’l-akrân Nâzikî Mehmed Ağa b. Hasan tarafından ikrâr-ı âti’l-beyânı tasdîke vekîl olup nehc-i şer‘î üzre vekâleti sâbite olan Mehmed Çelebi b. Sinan nâm vekîl mahzarında bi’l-vekâle ikrâr ve takrîr-i kelâm edip müvekkile-i mezbûre Âişe Hâtun silk-i mülk-i sahîhinde münselik olup medîne-i mezbûrda Nişancı Paşa mahallesinde vâki‘ iki tarafı müvekkile-i mezbûrenin harmanlığı ve bir tarafı ba‘zan Berberzâde Ramazan Çelebi b. Ali mülkü ve ba‘zan Sâime Hâtun vakfı olan menzil ve bir tarafı müvekkil-i mezbûr Mehmed Ağa mülkü ile mahdûd eşcâr-ı müsmire ve gayr-ı müsmireyi müştemil olup tûlen ve arzen bi hesâb-ı şatrancî beş yüz zirâ‘ mülk arsayı, cemî‘ tevâbi‘ ve levâhıkı ile müvekkil-i mezbûr Mehmed Ağa’ya yüz elli esedî guruşa bey‘ ve temlîk ve teslîm edip ol dahi minvâl-i muharrer üzre iştirâ ve kabûl ve temellük ve tesellüm eyledikden sonra semeni olan meblağ-ı mezbûr yüz elli esedî guruşu müvekkil-i mezbûr Mehmed Ağa yedinden vekâlet-i mahkiyem hasebiyle bi’t-tamâm ahz ve kabz eyledim ba‘de’l-yevm zikr olunan arsada müvekkilem mezbûre Âişe’nin aslâ alâka ve medhali yokdur, müvekkil-i mezbûr Mehmed Ağa’nın mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb kayd şüd. Fi’l-yevmi’t-tâsi‘ min Şa‘bâni’l-mu‘azzam li sene tis‘în ve elf. Şuhûdü’l-hâl: Hüseyin Halîfe b. Mehmed, Abdi Çelebi b. Mustafa, Ahmed Çelebi b. Abdullah, Ali Ağa b. Süleyman , Hüseyin b. Ali, Mehmed b. Eyüb.