Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 137 Hüküm no: 94 Orijinal metin no: [16b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zafiri v. Hristo ile karısı Sultana bt. Kiryaki’nin menzillerini Vidos Bahçesi Vakfı’na istiğlâl yoluyla satıp kiralaması Havâss-ı Aliyye kazâsına tâbi‘ Avasya nâm karye ahâlîsinden olup husûs-ı âti’l-beyâna kendi tarafından asîl ve zevce-i menkûhası Sultana bt. Kiryaki nâm nasrâniyye tarafından vekîl-i sâbitü’l-vekâlesi olan Zafiri v. Hristo nâm zimmî meclis-i şer‘-i şerîfde Hadîka-i Vidos Bahçesi gılmânına mevkūfe nukūda bi’l-fi‘l mütevellî olan hadîka-i mezbûre ustası Ömer Usta b. Rıdvan tarafından ikrâr-ı âti’l-beyânı tasdîke vekîl olup nehc-i şer‘î üzre vekâleti sâbite olan hadîka-i mezkûre gılmânının bölükbaşısı Habib Bey b. Süleyman mahzarında bi’l-asâle ve bi’l-vekâle ikrâr ve i‘tirâf edip ale’l-iştirâki’s-seviy silk-i mülk-i sahîhimde münselik olup karye-i mezbûrede vâki‘ Trandafilo v. ( ) mülkü ve bir tarafdan müvekkile-i mezbûre Sultana mülkü ve bir tarafdan Preşkova nâm zimmî mülkü ve bir tarafdan tarîk-i âm ile mahdûd bir bâb fevkānî oda ve altında bir mahzeni müştemil mülk menzilimizi cemî‘ tevâbi‘i ile mütevellî-i mezbûr Ömer Usta’ya elli esedî guruşa bi tarîki’l-istiğlâl bey‘ ve teslîm ol dahi vakf-ı mezbûr malıyla tarîk-i merkūm üzre iştirâ ve tesellüm ve kabz ve kabûl eyleyip semeni olan meblağ-ı mezbûr elli esedî guruşu mütevellî-i mezbûr Ömer Usta yedinden asâlet ve vekâletim hasebiyle tamâmen ahz ve kabz eylediğimizden sonra yine mütevellî-i mezbûr menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâb şehri gurresinden her senede yedişer buçuk esedî guruşdan üç sene tamâmına değin cem‘an yirmi iki buçuk esedî guruş ücret ile bize îcâr ve teslîm biz dahi ale’l-iştirâk istîcâr ve tesellüm ve kabz eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb kayd şüd. Fi’l-yevmi’t-tâsi‘ min Şa‘bâni’l-mu‘azzam li sene tis‘în ve elf. Şuhûdü’l-hâl: Abdullah Çelebi b. Mehmed, Mustafa Çelebi b. Ali, İbrahim b. Hamza, Hüseyin b. Ali ve gayruhüm.