Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 137 Hüküm no: 95 Orijinal metin no: [16b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan Çelebi’nin Kadı İbrahim Efendi’den alacağı olduğunun tespiti Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Nişancı mahallesi sükkânından işbu râfi‘ü’l-kitâb Ramazan Çelebi b. Ali nâm kimesne meclis-i şer‘-i şerîfde mahmiye-i İstanbul’da Koca Mustafa Paşa kurbunda Duhânîzâde mahallesi sâkinelerinden olup yine mezkûr Duhânîzâde mahallesi imâmı Abdurrahman Efendi b. Hüseyin ve Abdi Çelebi b. Mustafa nâm kimesneler ta‘rîfleriyle mu‘arrefe ve sâbıkan Halomic kadısı gāib ani’l-meclis olan İbrahim Efendi’nin zevce-i menkûhası Fâtıma Hâtun bt. Mahmud mahzarında takrîr-i kelâm ve ta‘bîr ani’l-merâm edip mezbûre Fâtıma Hâtun’un zevci mûmâ-ileyh İbrahim Efendi zimmetinde cihet-i karzdan sekiz yüz [elli] esedî guruş hakkım var idi yüz guruşunu ahz ve kabz edip hâlâ zimmetinde yedi yüz elli esedî guruş hakkım bâkī kalmağın bundan akdem meblağ-ı mezkûre merkūme Fâtıma Hâtun zevci mûmâ-ileyh İbrahim Efendi’nin emriyle kefîl ve zâmin olup yedime memhûr deyn temessükü vermişidi hâlâ mezbûre Fâtıma Hâtun’dan suâl olunup takrîri tahrîr olunmak matlûbumdur dedikde gıbbe’s-suâl merkūme Fâtıma Hâtun cevâbında fi’l-hakīka merkūm Ramazan Çelebi’nin zevci mûmâ-ileyh İbrahim Efendi zimmetinde bâkī kalan meblağ-ı mastûr yedi yüz elli esedî guruş hakkına ber vech-i muharrer emriyle kefîl ve zâmine olup işbu deyn temessükünü ben verdim deyû meblağ-ı bâkī yedi yüz elli esedî guruşa kefîl olduğunu bi’t-tav‘ ve’r-rızâ ikrâr etmeğin işbu vesîka hıfzan li’l-makāl ketb olundu. Fi’l-âşir min Şa‘bâni’l-mu‘azzam li sene tis‘în ve elf. Şuhûdü’l-hâl: Ahmed Çelebi b. Hasan Bağdâdîzâde, Abdülaziz Efendi Hoca-i mekteb, Ahmed Çelebi b. Abdullah, Şaban b. Fazlullah, Ahmed Çelebi b. Hüseyin, Kasım Çelebi b. Mustafa, Mehmed b. Eyüb.